Publikashonnan resien ta krea e impreshon ku serka algun hende ta eksistí malkomprondementu tokante ròl i tarea di Kolegio Ehekutivo. Pa Gezaghèber esaki ta motibu pa na nòmber di Kolegio Ehekutivo duna e siguiente splikashon.
Boneiru no solamente tin un komunidat dinámiko, pero tambe tin un forsa di atrakshon riba trahadónan di plan di pafó di nos isla. Sigur ora ta trata di por ehèmpel desaroyo di un tereno of un konstrukshon grandi, tin hende ta kurioso pa sa kiko Kolegio Ehekutivo ta pensa di un sierto inisiativa. Sinembargo no ta na Kolegio Ehekutivo pa reakshoná riba plannan ku ainda ta den fase di pensamentu.
E trayekto usual ta ku un hende ku ta bini ku un inisiativa, na dado momentu ta presentá su plan na Kolegio Ehekutivo i si ta nesesario ta pidi pèrmit pa por sigui pa e fase di ehekushon. Esei ta e momentu apropiá pa Kolegio Ehekutivo – por sierto no promé ku a optené tur konseho preskribí – tuma un punto di bista argumentá i eventualmente presentá esaki pa toma di desishon na Konseho Insular.
Lo no ta un ehèmpel di bon gobernashon si Kolegio Ehekutivo, komo reakshon riba publikashonnan no-ofisial i sin ta na altura di tur echo, ekspresá un wisio. Esaki ta e motibu pakiko Kolegio Ehekutivo ta tuma un posishon reservá relashoná ku plannan ku (ainda) no tin un státus ofisial. Un konsiderashon práktiko tambe ta hunga un ròl den esaki: hopi plan no ta yega mas leu ku e fase di planifikashon.
Banda di desaroyo i ehekushon di maneho ku Konseho Insular a stipulá, Kolegio Ehekutivo ta responsabel pa mantenshon di lei i regulashon. Si surgi un desaroyo ku ta en pugna ku lei i regulashon, lo aktua konforme e trayekto ku ta apropiá pa esei. Mientrastantu Kolegio Ehekutivo ta aploudí kada inisiativa ku – naturalmente denter di lei i regulashon – ta kontribuí na desaroyo di Boneiru.
