E plan ta enfoká entre otro riba energia sostenibel, awa, naturalesa i produkshon lokal di kuminda.
E Plan di Klima ta resultado di un trayekto ku a kuminsá na 2024 ku Mesa di Klima Boneiru. E plan ta trahá bou di liderazgo di presidente Reynolds (Nolly) Oleana den kolaborashon ku komunidat boneriano, organisashonnan, empresarionan, hóbennan i partnernan di gobièrnu.
Kambio di klima tin konsekuensia direkto pa Boneiru. Temperatura ku ta subi, periodonan mas largu di sekura, yobida fuerte i subida di superfisie di laman ta bini ku sierto riesgonan pa naturalesa, ekonomia, infrastruktura i ambiente di biba. Pa e motibu akí e plan di klima ta kontené medidanan dirigí riba tantu limitashon di kambio di klima komo oumento di resiliensia di nos isla.
Den esaki ta enfoká entre otro riba energia sostenibel, maneho sostenibel di awa manera rekohementu di awa di yobida, restorashon di naturalesa manera replantamentu, fortifikashon di produkshon di kuminda lokal manera nos agrikultura, krio di bestia i piskamentu, i tambe konsientisashon den komunidat.
Kolegio Ehekutivo ta ekspresá su apresio pa tur hende ku a kontribuí na e proseso. Spesialmente e miembronan di Mesa di Klima, direktorado di Planifikashon i Desaroyo e grupo di resonansia, e organisashonnan partisipante, e hóbennan i tur habitante ku a aportá na e proyekto akí. Tambe ta rekonosé e sosten di ministerio di Asuntunan Ekonómiko, ministerio di Asuntunan Interno i Relashonnan den Reino i ministerio di Infrastruktura i Maneho di Awa.
Ku stipulashon di e Plan di Klima, e atenshon ta pasa awor pa e ehekushon. Den e lunanan i añanan binidero ta bai realisá e medidanan. E lema ku alumnonan di grupo 8B di skol básiko a formulá, na un manera impreshonante ta resumí ambishon di e plan:
‘Nos isla, nos responsabilidat.’
