Dia 17 di ougùstùs a tuma lugá e promé edishon di Clean up Day ‘Boneiru: Limpi i Bunita’, kaminda sentenares di boluntario entusiasmá a traha duru pa hasi Boneiru mas limpi i mas bunita. Durante e akshon akí a rekohé en total no ménos ku 28.000 kilo di shushi, ku a varia di artíkulo di uso doméstiko te plèstik i otro tipo di shushi.
Diputado Nina den Heyer, ku tambe a partisipá na e akshon di limpiesa, a ekspresá su sintimentunan miksto tokante e resultado. “Mi ta kontentu i orguyoso ku e tantísimo hendenan ku a komprometé nan mes pa hasi Boneiru limpi. Ta fantástiko pa mira kuantu enbolbimentu tin for di den komunidat,” asina Den Heyer a bisa. “Na mes momentu ta preokupante kuantu shushi nos ta topa kuné te ainda den nos bunita naturalesa. Esaki ta un señal ku nos tin hopi trabou pa hasi ainda pa oumentá konsientisashon i pa mantené nos isla limpi.”
Ku e promé edishon akí ya kaba e kampaña di Boneiru Limpi i Bunita a proba kon importante ta pa traha huntu pa un Boneiru mas limpi i mas salú. Ya kaba e organisashon ta trahando riba un plan pa un akshon nobo di limpiesa mas lat e aña akí, ku e speransa di logra hasi nos isla mas limpi ainda i di krea mas konsientisashon rònt di maneho di shushi.
