Ofisialmente a entregá e buki ‘Antilliaans Erfgoed – Patrimonio Antiano’, den kua ta deskribí kon komunidatnan a desaroyá na islanan ABC, na gezaghèber interino Reynold ‘Nolly’ Oleana i Franklin ‘Bòi’ Antoin, presidente di FuHiKuBo. E buki ta parti di e proyekto ‘Travelling Caribbean Heritage’.
E buki ta laga e lesadó pensa tokante e patrimonio kultural di Aruba, Boneiru i Kòrsou i e diáspora antiano na Hulanda. ‘Antilliaans Erfgoed – Patrimonio Antiano’ ta konsistí di dos tomo. Den e promé tomo, ‘Toen en nu – Ántes i awor’ ta investigá kon den e pasado kolonial tabata mira kulturanan lokal i kon e kulturanan akí a emansipá nan mes pokopoko. Den e di dos tomo ‘Nu en verder – Awor i mas aleu’, preguntanan tokante e desafionan ku e kulturanan akí ta konfrontá awendia ta para sentral.
Un liña kòrá ku ta kore atraves di ámbos tomo ta kon e opinionnan tokante patrimonio kultural tabata i ta konektá ku otro, i e desafionan di formashon di nashon i ‘nation branding’, merkadeo di nashon. Por haña e buki ‘Antilliaans Erfgoed – Patrimonio Antiano’ na Biblioteka Públiko Boneiru na Kaya Gramèl. Por haña un ehemplar tambe den arkivo di FuHiKuBo.
Un tim di sientífiko di orígen hulanda karibense i hulanda oropeo a skirbi e buki ‘Antilliaans Erfgoed – Patrimonio Antiano’ ku ta parti di e proyekto ‘Travelling Caribbean Heritage’. Den e proyekto ‘Travelling Caribbean Heritage’ sientífikonan sénior i spesialistanan riba tereno di patrimonio, huntu ku hóbennan, ta investigá kon dokumentashon di i reflekshon riba patrimonio por kontribuí na desaroyo di komunidatnan.
E proyekto ‘Travelling Caribbean Heritage’ di e Organisashon Hulandes pa Investigashon Sientífiko (Nederlandse Organisatie voor Wetenschappelijk Onderzoek - NWO) ta bou di direkshon di Prof.dr. G. Oostindie i dr. Alex van Stipriaan, ku kordinashon i aporte di Liliane de Geus i Stacey Macdonald na Boneiru.
