14 di sèptèmber na Boneiru a entregá diputado Timoteo Silberie e Konseho di Hóben pa islanan BES. A realisá e konseho a base di un investigashon di UNICEF Hulanda i Ipsos I&O bou di hóbennan di Boneiru, Sint Eustatius i Saba. Hóbennan a kontribuí na esaki kompartiendo nan eksperensianan, preokupashonnan, ideanan i rekomendashonnan. Ku e entrega, a pone e puntonan akí direktamente na konosementu di kolegio ehekutivo di Entidat Públiko Boneiru.
Durante e enkuentro, diputado Silberie a tuma tempu pa kòmbersá tokante loke hóbennan na Boneiru ta haña importante. A suprayá klaramente ku gobièrnu no solamente mester papia tokante hóben, sino spesialmente kú hóbennan. E diputado a ekspresá su apresio pa e ròl positivo di Ibrahim Valentijn, ku a entreg’é e rapòrt. Ademas e diputado a gradisié enfátikamente pa su dedikashon, kompromiso i disposishon pa representá e bos di hóbennan.
Konseho di Hóben islanan BES 2026 ta mustra ku hóbennan ta sinti ku gobernantenan no ta skucha nan sufisientemente. Den e investigashon, hóbennan ta duna Entidat Públiko Boneiru un promedio di 5,4 pa skucha hóbennan i muchanan. Kasi mitar di hóbennan ta indiká di tin poko te hopi poko konfiansa den Entidat Públiko Boneiru. Mes momentu nan ta menshoná tópikonan konkreto ku segun nan mester di akshon, manera salú mental, tentamentu i riesgonan di seguridat for di otro pais.
P’esei pa Boneiru e entrega ta un paso importante. E diputado tin intenshon di bai kòmbersá mas biaha ku hóbennan, asina nan bos ta haña un lugá struktural den maneho i gobernashon di Boneiru. Meta ta pa skucha mihó loke hóbennan ta eksperensiá, kiko ta preokupá nan i kua solushon nan mes ta proponé.
“Bos di hóbennan ta indispensabel ora ta traha maneho ku ta bai tokante nan futuro. E entrega akí ta un bon komienso pa enbolbí hóbennan na Boneiru mas frekuente i mas mihó den desishonnan ku ta toka nan,” segun diputado Timoteo Silberie.
Di e manera akí, hóbennan ke laga mira kon importante ta ku nan por kompartí nan eksperensianan i ku ta tuma nan na serio. Entidat Públiko Boneiru ta konsiderá e entrega di e Konseho di Hóben komo un paso konkreto pa fortalesé nan enbolbimentu. Dialogando regularmente ku hóbennan, por tene mas kuenta ku nan aporte den maneho i ehekushon.
