E konferensia ‘Ketenaanpak Overgewicht’ (Aserkamentu di kadena pa Sobrepeso), organisá pa GGD Boneiru / Salubridat Públiko, riba djasabra 13 di yüni 2026 a trese eksperto-, esnan ku ta traha maneho i partnernan di kadena huntu pa papia tokante aserkamentu konhuntamente di sobrepeso i obesidat bou di adulto i mucha na Boneiru. Durante e enkuentro, interkambio di konosementu, enkuentro i kolaborashon tabata sentral.
Sobrepeso i obesidat ta temanan kompleho ku ta bai mas leu ku solamente alimentashon i moveshon. Sobrepeso i obesidat no ta afektá solamente salú di hende, pero tin influensia tambe riba bienestar, partisipashon i kalidat di bida. P’esei un aserkamentu amplio ta nesesario.
E konferensia a dirigí su mes riba fortifikashon di e aserkamentu di kadena na Boneiru. Ademas organisashonnan di kuido, bienestar, deporte i enseñansa ta traha huntu pa logra un aserkamentu duradero di sobrepeso i obesidat. E enkuentro a atraé un grupo diverso di partisipante i oradó. Durante diferente presentashon i kombersashon, a kompartí konosementu balioso tokante e situashon na Boneiru, eksperensianan ku e aserkamentu di kadena na Hulanda i invershonnan ku ta nesesario pa sigui duna forma na un aserkamentu lokal eksitoso.
E partisipantenan a enfatisá ku impakto duradero ta solamente posibel ora profeshonalnan di kuido, gobièrnu i organisashonnan sosial traha huntu intensivamente.
Den su palabra di apertura, diputado Timoteo Silberie tambe a suprayá importansia di un aserkamentu fuerte di kadena:
‘Konosé otro, sa kon pa yega na otro i tuma responsabilidat konhuntamente ta krusial pa laga e aserkamentu ta eksitoso.’
Pa mas informashon òf pregunta tokante e Aserkamentu di Kadena pa Sobrepeso, GGD Boneiru / Salubridat Públiko di Entidat Públiko Boneiru ta alkansabel via telefòn 7155330 òf via e-mail: bonsaluggd@bonairegov.com.
