Entidat Públiko Boneiru (EPB) den kolaborashon ku Hulanda ta bai invertí den aeropuerto di Boneiru, pa sòru ku den futuro esaki por kumpli mas mihó ku standartenan di siguridat internashonal. Tambe den e añanan binidero ta bai ekspandé i modernisá e terminal di Bonaire International Airport (BIA), ku atenshon pa sostenibilidat.
Diputado Hennyson Thielman, minister Mark Harbers di Infrastruktura i Maneho di Awa, direktor di BIA Maarten van der Scheer i Representante di Reino Jan Helmond (na nòmber di ministerio di Asuntunan Interno i Relashonnan den Reino) riba djárason a firma un akuerdo ku mester trese mehorashon i ekspanshon di Aeropuerto Flamingo un paso mas aserka. A base di su ròl Reino ta responsabel pa sòru pa siguridat na Hulanda Karibense. Ku e invershon por modernisá e plataformanan, di manera ku nan ta konektá mas mihó ku e nivel di siguridat ku e organisashon di aviashon sivil internashonal ICAO ta verwagt.
Aparte di e plataformanan ta invertí tambe den mehorashon di e aeropuerto mes. Lo finansiá ekspanshon i modernisashon di e terminal den forma eksterno i via e asina yamá ‘luchthavengelden’. Di e manera akí ta bai ekspandé e terminal i proveé esaki ku mas energia sostenibel di propio produkshon. Huntu ku Hulanda Boneiru ke sòru tambe ku BIA ta kla pa e aviashon sostenibel di futuro. Pa e motibu akí na momentu di restrukturashon di e plataformanan lo tene kuenta ku binida di avion eléktriko.
Aviashon seif i sostenibel
Boneiru ta hinka 6,6 mion euro den atendementu ku e plataformanan. Hulanda ta invertí 15 mion euro. En total e intenshon ta pa invertí 50 mion euro den nos aeropuerto. ‘Ku e invershonnan akí den futuro nos aeropuerto por reakshoná mas fásil i rápido riba eksigensianan internashonal di siguridat, esaki ta importante pa un aviashon seif’, segun Harbers. ‘Pero ta di importansia tambe ku e aeropuerto ta keda di i pa habitantenan di Boneiru. Finalmente mi ta kontentu ku a base di e plan akí ta prepará Boneiru pa e aviashon sostenibel di futuro. Pa motibu di e distansianan kòrtiku i e kantidat relativamente chikitu di pasahero riba e buelonan entre e islanan, Hulanda Karibense ta sumamente adekuá pa e forma sostenibel di aviashon akí.’
Diputado Thielman: ‘Ku ekspanshon di Aeropuerto Flamingo nos ke sòru pa realisá e fluho di pasahero na aeropuerto den un forma seif, sostenibel i kualitativamente bon. Bon infrastruktura ta esensial pa un desaroyo ekonómiko stabil pa futuro i sostenibel i e ta e ‘business card’ di nos isla.’
‘Aeropuerto Flamingo ke fasilitá e demanda ku ta oumentando na un manera seif, sostenibel i kualitativamente bon, den un forma ku ta kuadra ku Boneiru’, segun direktor di BIA Van der Scheer. ‘Ku yudansa di ámbos ministerio i nos isla nos por hasi esaki posibel. Nos ta hopi kontentu ku e bon kolaborashon i sosten di nos partnernan. Ora ku kaba ku e plannan, nos aeropuerto ta kla pa futuro.’
