Bon Bini Bonaire nobo ta enfoká riba sostenibilidat

Ònferwagt Boneiru a haña un pida naturalesa aserka.

Kralendijk – Ònferwagt Boneiru a haña un pida naturalesa aserka: awa shushi purifiká ku ainda no ta nesesario pa metanan di agrikultura a forma un área húmedo (wetland) riba tereno di e servisio di Agrikultura, Krio di Bestia i Peska, ku a desaroyá su mes i bira un berdadero paraiso pa para ku ta trese asta espesienan nobo na nos isla.

Esaki ta un di e tópikonan den e edishon nobo di e revista Bon Bini Bonaire, un publikashon di Gabinete di Gezaghèber di Boneiru ku ta intenshoná pa informá interesadonan pafó di Boneiru tokante desaroyonan riba nos isla. Den diferente artíkulo ta suprayá e título riba e portada ‘Enfoke riba sostenibel’, manera lantamentu di un parke pa salba e palma úniko di Sábal, e próksimo prohibishon riba uso di plèstik desechabel, oumentu di produkshon lokal di bèrdura, fruta, karni i piská i stimulashon di transporte eléktriko.

‘Boneiru su deseo mas grandi ta pa mas pronto posibel hasi e transishon pa un ekonomia sirkulario ku ta funshoná kompletamente riba fuentenan sostenibel di energia. Esaki ta e meta final di nos konsepto di Blue Destination. For di chikitu nos komo boneriano ta lanta ku amor pa naturalesa. Pa hopi siglo kaba nos ta biba den harmonia ku naturalesa’, asina gezaghèber Edison Reina ta skirbi den e prólogo.

Mas aleu den e edishon di verano di Bon Bini Bonaire ta dediká atenshon na entre otro e investigashon pa loke ta trata desaroyo di un haf di kònteiner, e manera pa sigurá suministro di kombustibel, e ambishon pa akselerá transishon di turismo di masa pa turismo di kalidat, nifikashon di e jobcenter Plenchi di Trabou den tempu di krísis, e proyekto Street Colors ku ta hasi Boneiru mas kolorido ainda, introdukshon di un variante karibense di e Garantia Hipotekario Nashonal (Nationale Hypotheekgarantie), e aserkamentu multidisiplinario pa sera porta pa organisashonnan kriminal, e akuerdo históriko ku dunadónan di trabou, sindikatonan i nos gobièrnu lokal a sera i e prioridatnan di e diputado nobo Hennyson Thielman.

Por download e edishon nobo di Bon Bini Bonaire grátis via https://bonairegov.com/pa/bestuur-organisatie/bon-bini-magazine