Dia 3 di yüli for di 17:30 or pa 19:30 or tin un enkuentro di informashon inspirativo tokante ‘Bo granito pa Boneiru – BGPB’ na Sentro di Bario Nikiboko. Via ‘Bo granito pa Boneiru’ organisashonnan, empresarionan i empresanan ku kurason pa nos dushi Boneiru por kontribuí na desaroyo di hubentut boneriano. Hóbennan di 12 pa 30 aña ta haña oportunidat pa atkirí eksperensia i konosementu nobo serka un organisashon òf empresa. Nan ta desaroyá nan talentonan skondí. Pa medio di nan bèkgrount i nan edat nan ta sòru pa un aporte nobo i refreskante na e organisashonnan, kompanianan òf empresanan.
‘Bo granito pa Boneiru’ tabata anteriormente konosí komo ‘Maatschappelijke Diensttijd Bonaire – MDT’. Nan a kambia e nòmber akí pa hasi bon kla ku e hóbennan, organisashonnan i empresanan ku partisipá na e proyekto tin benefisio di esaki. Durante e enkuentro di 3 di yüli 2025 nan ta splika kon organisashonnan sosial i empresanan por partisipá na diferente manera. No ta importá riba kua tereno un organisashon òf un empresa ta aktivo. Den konsulta ku e kordinadó di proyekto BGPB nan ta ofresé un trayekto na midí.
Durante e enkuentro nan ta para ampliamente ketu na e tres pilánan di e proyekto, esta:
1. Enkuentro, hóbennan ta bini den kontakto ku hendenan i organisashonnan inspirativo.
2. Desaroyo, e partisipantenan ta desaroyá nan talentonan i abilidatnan.
3. Traha huntu, e hóbennan i e organisashonnan i empresanan ta kontribuí na fortifikashon di nos komunidat.
Pa e enkuentro di 3 di yüli 2025 organisashonnan, kompanianan i empresanan por registrá via whatsapp na +599 796 2999.
‘Bo granito pa Boneiru’ ta un kolaborashon entre ministerio di Enseñansa, Kultura i Siensia (OCW), Maatschappelijke Diensttijd Nederland i direktorado di Komunidat i Kuido di entidat públiko Boneiru.
