Den kuadro di su despedida komo hefe di delegashon di Komishon Oropeo na Guyana, e siman akí señor René van Nes ta hasi un bishita di trabou na Aruba i Boneiru. Durante su bishita na Boneiru, riba djaluna 7 di yüli 2025 a tuma lugá un konsulta stratégiko ku diputado Nina den Heyer na ofisina di gobernashon di Entidat Públiko Boneiru.
Tópiko prinsipal di e kòmbersashon tabata e kolaborashon entre Komishon Oropeo i Boneiru, ku un enfoke spesífiko riba e proyektonan ku ta finansiá ku fondonan oropeo. Tabata trata akí di entre otro tendensianan regional, progreso di e proyektonan ku ta andando i e impakto sosial di e invershonnan di Union Oropeo riba nos isla. A para ketu tambe na e sosten ku Union Oropeo pa medio di e Fondo Oropeo di Desaroyo (Europees Ontwikkelingsfonds – EDF) a ofresé na ehekushon di e maneho integral preventivo di hubentut ‘Hóben Talentoso’ di Boneiru. E medionan akí ta hasi vários programa posibel ku ta enfoká riba fortifikashon di e infrastruktura sosial pa hóbennan, manera akohida despues di skol, partisipashon di hóben i prevenshon di ‘drop out’. Diputado Nina den Heyer a enfatisá ku e kolaborashon akí ku Union Oropeo ta di gran balor pa nos isla. ‘Danki na e sosten akí nos por invertí den un situashon kaminda tur hóben di Boneiru ta lanta ku hopi oportunidat. E ta kontribuí na nan bienestar, nan desaroyo i nan perspektiva pa futuro.’
Tambe Union Oropeo na aña 2024 a pone finansiamentu disponibel pa maneho sostenibel di awa sushi i nan a pone finansiamentu disponibel pa proyektonan riba tereno di protekshon di naturalesa i investigashon na Boneiru. Banda di esaki Komishon Oropeo regularmente ta organisá tayer i entrenamentu riba tópikonan manera kambio di klima, energia sostenibel, digitalisashon, konektividat i protekshon di naturalesa, na kua ekspertonan di Boneiru for di diferente organisashon a partisipá i kaminda ta fortifiká e kolaborashon regional tambe relashoná ku e tópikonan akí. Dia 8 di yüli gezaghèber John Soliano a papia ku e hefe di delegashon komo finalisashon di su bishita di trabou.
Entidat Públiko Boneiru ta gradisí señor Van Nes pa su kompromiso den nos region i ta dese’é hopi éksito ku su karera den futuro.
Di robes pa drechi: Reginald de Palm (konsehero di maneho DSZ), Elisabeth Veldbloem (ménedjer i programa hubentut), Nina den Heyer (diputado), Rene van Nes (hefe di delegashon Union Oropeo komishon Guyana), Suzanne Hom (sekretario di direktorado DSZ).
