Bin bishitá Dia di Canon na Fontein dia 17 di mei.
Deskubrí i rebibá storia di e lugá spesial akí na Boneiru.
Un dia di famia perfekto pa eksperensiá nos storia, nos historia i nos kultura.
For di desèmber 2025 Entidat Públiko Boneiru ta trahando riba e Canon di Boneiru. E Canon ta un liña di tempu moderno di Boneiru. E ta presentá susesonan, hendenan, sitionan, edifisionan, músika, baile i storianan importante. E proyekto di Canon di Boneiru ta forma parti di e Agènda di Akshon Pasado di Sklabitut i direktorado di Komunidat i Kuido ta ehekutá e proyekto akí.
Den e periodo tras di lomba, direktorado di Planifikashon i Desaroyo a okupá su mes ku restorashon di e bakinan di awa. Nan a traha riba mehorashon di Fontein su aksesibilidat i e posibilidat pa kana den e plantashi akí. Nos ta invitá habitantenan di Boneiru pa nan mes bin eksperensiá esaki dia 17 di mei. Riba e dia akí pa promé biaha nos ta selebrá Dia di Canon na Boneiru i nos ta habri Fontein su portanan pa grandi i chikí pa e dia spesial akí.
Durante e evento ofisial di apertura di Canon di Boneiru dia 17 di mei, diferente rekorido ta bai tuma lugá na Fontein, kaminda nan ta konta e historia riku di e área akí. Parti mainta FuHiKuBo ta organisá e rekoridonan akí. Bishitantenan ta siña tokante e promé habitantenan, nan por wak e pinturanan den baranka i nan ta tende tokante rebelion i lantamentu durante e periodo di sklabitut. Tambe nan ta haña konosementu tokante e storianan tras di e bakinan di awa, nan ta siña mas tokante Segundo Guera Mundial i hopi mas. Banda di esaki lo tin un lùnch familiar konhunto. Durante un seshon interaktivo i diferente tayer parti mèrdia, bo por yuda pensa i skohe kua ta e tópikonan ku mester bini den e Canon di Boneiru.
Den e programashon di e Dia di Canon dia 17 di mei tin espasio ainda parti mèrdia pa komunidat proponé aktividat. Pensa por ehèmpel riba un tayer di Spoken Word, un tayer di Kuranderia òf un tayer di pintamentu. Bo tin un bon idea pa un aktividat riba Dia di Canon? Manda bo idea pa mas tardá djaluna 27 di aprel na daudi.cijntje@bonairegov.com
Spesialmente pa Dia di Canon di Boneiru, Entidat Públiko Boneiru tin bùs disponibel ku ta kore bai Fontein, debí na e oportunidat limitá pa stashoná outo na Fontein. Pa e motibu akí kordialmente nos ta supliká públiko pa hasi uso di e servisio spesial di bùs akí.
Entidat Públiko Boneiru lo tene públiko na altura di tur desaroyo tokante e promé Dia di Canon di Boneiru. Dentro di poko ta sigui mas informashon tokante kon públiko por registrá pa esaki i tokante e servisio spesial di bùs pa bai Fontein dia 17 di mei.
