Biblioteka Pùbliko Boneiru, ku ta forma parti di Entidat Públiko Boneiru, durante e BID Awards a keda proklamá komo Organisashon di Gobièrnu Mas Positivo di Aña di henter Hulanda. Na un manera spesial e rekonosementu nashonal prestigioso akí ta rekonosé e ròl sosial importante di nos biblioteka na Boneiru.
E hurado a elogiá Biblioteka Pùbliko Boneiru pa su imágen positivo, su konekshon fuerte ku komunidat i e manera aksesibel ku e ta sostené habitantenan di tur edat riba tereno di edukashon, kultura i desaroyo personal. Nan ta mira biblioteka komo un sitio di enkuentro seif i inspirativo pa henter nos komunidat.
Jennifer Pocornie-Martis, hefe di departamento di Biblioteka Públiko Boneiru, ta reakshoná ku gratitut: “E premio akí ta un bunita konfirmashon di e trabou duru i e dedikashon di henter nos tim. Diariamente nos ta hasi esfuerso pa ta un sitio habrí, kaluroso i inklusivo pa tur hende na Boneiru. Ku awor akí nan ta rekonosé e kompromiso akí asina positivamente na nivel nashonal, ta nifiká demasiado hopi pa nos. Banda di esaki kordialmente nos ke gradisí tur hende ku a vota pa nos pa e konfiansa i e sosten.”
Entidat Públiko Boneiru tambe ta orguyoso di e rekonosementu nashonal akí. Diputado Peter Silberie ta reakshoná: “E rekonosementu pa Biblioteka Públiko Boneiru ta suprayá ku invershon den desaroyo di hende, den kultura i den aksesibilidat ta duna rendimentu. Esaki ta un ehèmpel fuerte di kon organisashonnan públiko na Boneiru tambe por hasi impakto sosial, tantu na nivel lokal komo nashonal.”
Biblioteka Públiko Boneiru ta organisá entre otro proyektonan pa promové lesamentu, programanan edukativo i aktividatnan kultural ku ta kontribuí na desaroyo sosial i kultural di nos isla. Ku biblioteka a haña nominashon i finalmente a sali ganadó ta aksentuá e konfiansa i apresio di nos komunidat i nos partnernan di kolaborashon, tantu na nivel lokal komo nashonal.
Ku e premio akí, Biblioteka Públiko Boneiru ta mira komo su mishon pa kontinuá ku e desaroyo positivo akí i pa sigui komprometé su mes pa un komunidat fuerte, konektá i ku enfoke riba futuro na Boneiru.
