Na promé lugá Konseho Insular a partisipá na e kongreso anual di Asosashon di Munisipionan Hulandes ku e aña akí nan a tene na Hoorn ku komo tema: ‘Munisipionan den e mundu akí: huntu nos ta hasi e diferensia’.
Banda di e kongreso di Asosashon di Munisipionan Hulandes, Konseho Insular tabatin diferente sita. Un di e sitanan akí tabata e kòmbersashon habrí ku e sekretario di estado di Relashonnan den Reino i Digitalisashon, señora Van Huffelen, kaminda a papia tokante diferente tópiko, entre otro WolBES, infrastruktura (atrasá) na nos isla i e preisnan di energia ku ta subiendo na Boneiru.
Seguidamente Konseho Insular a risibí tambe un ‘briefing’ tékniko di empleadonan públiko di ministerio di Asuntunan Interno i Relashonnan den Reino relashoná ku revishon di WolBES i FinBES, kaminda a para ketu na e proposishonnan preliminar di kambio i e deseonan ku ta bini di Konseho Insular komo representante di pueblo.
Konseho Insular a hasi un bishita tambe na e Komishon pa Relashonnan den Reino di Eerste Kamer, kaminda a papia entre otro tokante e waf pa e terminal di petroli, e desaroyonan relashoná ku plantashi Bolivia, e retonan i oportunidatnan relashoná ku kambio di klima i suministro di energia pa nos isla i e eventual atendementu di interes di Boneiru na Hulanda.
Riba programa di Konseho Insular tabatin mas aleu un bishita planiá na e Komishon di Tweede Kamer pa Relashonnan den Reino, kaminda e miembronan di Konseho Insular a papia tokante e desaroyonan relashoná ku trabounan di konstrukshon na Boneiru, e gastunan pa akohida di mucha, sueldo mínimo na nos isla, bon gobernashon i kon pa sostenibilisá e trabou komo miembro di Konseho Insular. Alabes nan a ekspresá un palabra di gratitut pa tur yudansa i sosten finansiero pa Boneiru durante e periodo di corona.
Riba e último dia Konseho Insular a hasi un bishita na Raad van State. Durante e kòmbersashon akí nan a papia tokante e relashonnan mutuo den Konseho Insular, e problema di klima pa Boneiru, oumento di e kantidat di miembro di Konseho Insular i e infrastruktura atrasá na Boneiru.
Finalmente e lidernan di frakshon a tene un seshon di ‘brainstorm’ ku empleadonan públiko di ministerio di Asuntunan Interno i Relashonnan den Reino tokante efektividat di e trabou komo miembro di Konseho Insular i sostenibilisashon di esaki. Konseho Insular ta wak bèk riba un biahe di trabou eksitoso.
