Sekretario di estado Eric van der Burg, huntu ku tim di proyekto di Entidat Públiko Boneiru, a bishitá un kantidat di proyekto di Regio Deal na Boneiru. Durante e bishita di trabou, a bishitá diferente lokashon pa sera konosí ku e proyektonan i e plannan ku e próksimo añanan ta kontribuí na un Boneiru mas sostenibel, mihó aksesibel i prepará pa futuro.
Ta trahando riba e siguiente proyektonan denter di e Regio Deal:
- Transporte públiko
- Mehorashon di infrastruktura rònt di skol
- Instalashon di panel solar
- Mehorashon di logístika rònt di haf
Durante e bishita, e tim di proyekto di Entidat Públiko Boneiru a kompartí ku e delegashon e motibu, e metanan i impakto sosial di e proyektonan. Nan a kompartí tambe kua preparashon a tuma lugá kaba i kua paso ta bai tuma den e próksimo periodo pa ehekushon durante e 3,5 añanan benidero.
Regio Deal Boneiru ta un kooperashon entre Entidat Públiko Boneiru i Reino. Ku un invershon di € 13 mion, ta traha na proyektonan ku ta kontribuí na e bienestar amplio na Boneiru. E proyektonan ta enfoká entre otro riba stimulá konekshon físiko i sosial, aksesibilidat na nos isla, i oumentá kapasidat pa Boneiru yuda su mes.
Sekretario di estado Van der Burg:
“Boneiru ta kresiendo hopi lihé. Esaki ta pone preshon signifikante riba kalidat di bida, kondishon di bida, i laboral pa su residentenan. Regio Deal ta establesé hustamente pa atendé esaki. Mi ta mira ku a pone e promé pasonan kaba i mi ta ansioso pa mira mas resultado visibel pa e pueblo di Boneiru.”
Sekretario insular Christopher Frans ta enfatisá ku e bishita a mustra kon ambishon konhunto ta haña mas forsa. "Regio Deal ta mustra kiko nos por logra ora nos uni forsa. E proyektonan ku nos a bishitá awe ta un invershon den futuro di Boneiru. Aunke preparashon di basta tempu entre koleganan di Reino i EPB a tuma lugá tras di kortina, awor ta tumando paso importante pa e proyektonan akí bira realidat. Asina nos ta konstruí huntu un Boneiru duradero, aksesibel i habitabel pa e generashonnan aktual i esnan den futuro."
Entidat Públiko Boneiru ta wak bèk riba un bishita balioso. E bishita a konfirmá e kompromiso konhunto di tur partido envolví pa realisá e proyektonan di Regio Deal eksitosamente i sigui invertí den bienestar amplio di Boneiru.
Regio Deal Boneiru: Huntu konstruyendo futuro di Boneiru.
