Kralendijk - Awor aki siudadano di Boneiru di 18 aña bai ariba por mèldu via telefòn tambe pa trata un sita pa pasa angua kontra corona. Esaki por na e number di telefòn nobo i grátis: 0800 0900. Hende ku tin pregunta tokante bakunashon i e bakuna tambe por yama e number akí. E number nobo ta alkansabel for di djaluna te ku djabièrnè di 08:00 – 12:00 or i di 13:00 – 17:00 or. Djasabra e number ta alkansabel di 09:00 – 13:00 or. 0800 0900 ta alkansabel riba Bièrnè Santu i e djasabra promé ku Pasku di Resurekshon. Si e liñanan ta okupá, ta konsehá esnan ku ta yama pa purba yama mas lat.
Ta posibel tambe pa mèldu online pa pasa angua kontra corona na www.bonairecrisis.com Por hasi esaki 24 ora pa dia. Esaki ta e forma mas fásil pa traha un sita pa pasa angua. Pa e motibu ei tin hopi hende ku a hasi uso di e site kaba.
E otro number grátis 0800 0800 ta keda den uso pa hendenan ku ke traha un sita pa e tèst di corona. Ámbos number di telefòn ta di departamento di Salubridat Públiko. E departamento akí a kontratá i entrená e hendenan ku ta traha na e callcenternan.
