Ku orguyo Entidat Públiko Boneiru ta invitá pueblo di Boneiru i tur bishitante pa huntu selebrá nos dia nashonal. Ku e tema “Nos Ta Boneiru” nos ta para ketu na nos unidat, nos kultura i nos futuro. Dia 5 i 6 di sèptèmber nos ta bini huntu pa eksperensiá e momentu spesial akí ku un programa festivo yen di músika i tradishon.
Djabièrnè 5 di sèptèmber – Ban topa Dia di Boneiru
Di 19:00 or te 01:00 or
E anochi bispu di Dia di Boneiru ta den signo di topa otro, konektá i selebrá. E programa ta konsistí di diskursonan inspirativo, presentashon di artistanan lokal i baile. Eksaktamente pa 00:00 or huntu nos ta habri Dia di Boneiru ku un show espektakular di vürwèrk. Un anochi yen di energia ku bo no tin mag di pèrdè.
Djasabra 6 di sèptèmber – Seremonia i Selebrashon Kultural
E dia di fiesta mes ta kuminsá ku e seremonia ofisial 9 or di mainta, kaminda huntu nos ta hisa nos bandera i duna honor na nos orguyo nashonal.
For di 12:00 or e programa kultural ta ranka sali. Na diferente sitio bo ta topa ku rikesa di nos kultura: músika, baile, artesania i delisia kulinario di Boneiru. Un dia yen di tradishon, enkuentro i dibertishon, pa grandi i chikí.
Wak pa bo tambe t’ei!
Dia di Boneiru ta un dia ku huntu nos ta bisa: “Nos Ta Boneiru.”
Tur hende ta kordialmente bon biní pa eksperensiá e dianan spesial akí huntu ku nos.
