Siudadanonan ku di ougùstùs 2022 te novèmber 2023 a haña e kompensashon pa koriente di 1.300 dòler, ta haña outomátikamente un di dos kompensashon di 1.300 dòler. Direktorado Komunidat i Kuido ta hasiendo e preparashonnan pa regla e kompensashonnan. E direktorado i WEB ta hasiendo tur lo posibel pa depositá e kompensashon pa hendenan ku un kuenta di WEB promé ku fin di aña riba nan kuenta di WEB.
Siudadanonan ku Pagabon por pasa buska nan token di 1.300 dòler for di 8 di yanüari 2024 te ku 8 di febrüari 2024 na Direktorado Komunidat i Kuido. Nan ta haña nan kompensashon un tiki mas lat ku hendenan ku un kuenta di WEB, pasobra ta tuma mas tempu pa regla token di montante haltu. Por pasa buska token di djaluna te ku djaweps di 09:00 – 12: 00 i di 14:00 te 17:00 na Direktorado Komunidat i Kuido, Kaya Neerlandia 41.
Ta pidi hendenan ku a haña e promé kompensashon i despues a muda, òf tin un number di kliente nobo di WEB, pa duna e informashon akí. Nan por meil nan datonan nobo na: koriente@bonairegov.com òf yama/app 701 1055. Asina ta evitá ku e kompensashon ta bai pa e adrès robes, of ta duna esaki pa e konekshon robes.
Habitantenan ku no a yega di pidi e kompensashon promé, por hasi esei ainda. Pa kondishon i registrashon, bishitá www.bonairegov.com/stroom. Gobièrnu di reino a duna sèn pa bolbe duna e kompensashon na habitantenan di ménos rekurso. Un hende ku a haña e kompensashon anteriormente, no tin mester di bolbe hasi un petishon pa e di dos kompensashon.
Direktorado Komunidat i Kuido ta bai pèrkurá pa informá siudadanonan kon nan por usa energia na un manera ekonómiko. Usando energia di manera ekonómiko, siudadanonan por benefisiá mas largu di e kompensashon di koriente ku nan ta haña.
