Riba djabièrnè 28 di novèmber INDEBON a manda un delegashon di bintidos atleta hóben Paraguay, pa partisipá na Juegos Escolares, konosí tambe komo CONSUDE na Asunción. E kompetensianan deportivo pa mucha di skol den edat di 12 pa 14 aña ta tuma lugá for di 30 di novèmber te 7 di desèmber. Boneiru ta partisipá na e kompetensianan di atletismo, basketbòl, ahedres, futbòl di sala i landamentu. Diputado Peter Silberie tambe ta forma parti di e delegashon huntu ku e coachnan i e guianan. Silberie no por a biaha huntu ku e hóbennan, pero promé ku kuminsamentu di e weganan e ta djòin nan na Paraguay.
‘Mi ta kontentu ku nos atletanan hóben por a partisipá na Juegos Escolares. Nivel di e weganan ta hopi haltu. Intenshon di Juegos Escolares ta netamente pa kada atleta por sigui desaroyá su mes pa medio di partisipá na e weganan,’ asina e diputado a splika. Banda di esaki tin un otro punto importante. ‘Pa medio di partisipashon na e weganan, nos ta hasi e laso entre Boneiru i e pais anfitrion mas fuerte.’
Banda di Paraguay i Boneiru, e siguiente paisnan tambe ta partisipá: Argentinia,Brazil, Chile, Colombia, Uruguay, Ecuador, Peru i Venezuela. ‘Mi ta sinti mi honrá ku nos atletanan ta partisipá na Juegos Escolares. Esaki ta bon tambe pa promoshon di nos isla den eksterior,’ asina e diputado a deklará.
INDEBON ta sigui komprometé su mes pa desaroyo di talento deportivo hóben na nos isla. INDEBON ta deseá tur atleta hopi éksito na Paraguay.
