E paisnan Aruba i Kòrsou i Entidat Públiko Boneiru ta traha huntu riba desaroyo i promoshon di papiamentu – na Aruba konosí komo papiamento i na Boneiru i Kòrsou konosí komo papiamentu.
Awor akí ta sigui elaborá e akuerdo di kolaborashon ku na luna di yüli 2025 e diputado di e tempu ei, Nina den Heyer, a firma. Debí na e kambio resien di diputado, a deliberá tokante dunamentu di kontenido mas aleu na e akuerdo durante un enkuentro di sera konosí dia 6 di novèmber 2025 entre minister Sithree van Heydoorn (Kòrsou), minister Gerlien Croes (Aruba) i diputado Peter Silberie (Boneiru).
E akuerdo, ku ta vigente pa un periodo di tres aña, ta enfoká riba inisiativanan konhunto pa enseñansa, desaroyo di medio di instrukshon, profeshonalisashon di dosente i promoshon di idioma. Un grupo di trabou ku ta konsistí di representantenan di e tres islanan lo formulá un programa di trabou ku ta forma e kuadro práktiko pa proyektonan konhunto i interkambio di konosementu. Ehekushon di esaki lo tuma lugá despues di aprobashon atministrativo. Boneiru ta asumí e promé presidensia.
Ku e kolaborashon akí Aruba, Boneiru i Kòrsou ta konfirmá nan kompromiso kompartí pa konservashon, desaroyo i fortifikashon di papiamentu komo idioma konektivo den Reino Hulandes.
