Durante vakansi di Regata, kurá di SKAL ta konbertí den un sitio di enkuentro vibrante i kreativo pa komunidat di Boneiru. For di djaluna 6 di òktober te djasabra 11 di òktober nos muchanan i nos hóbennan di 6 pa 18 aña por partisipá na un programa variá yen di músika, baile, teater, pintamentu, obra di man i mas.
Ku e siman di vakansi kreativo Arte ta topa Regata, SKAL ta brinda tur mucha ku ta liber di skol un oportunidat pa deskubrí nan talentonan, desaroyá nan mes i eksperensiá e kultura riku di Boneiru.
Vários tayer i mini obra teatral musikal
Bou di guia di diferente coach eksperensiá for di vários disiplina artístiko, e partisipantenan ta partisipá na tayer den entre otro kanto, baile, músika, poesia, pintamentu i obra di man. Huntu nan ta siña konosé nan talentonan mas mihó, nan ta traha den grupo chikitu i nan ta interkambiá nan eksperensianan ku otro.
Tin un oportunidat spesial pa e muchanan ku ke partisipá na kreashon di un mini obra teatral musikal. E grupo akí ta trein tur dia for di 8 or di mainta te 12 or di mèrdia i riba djasabra 11 di òktober nan ta hasi un presentashon riba esenario pa públiko.
Festival di talento komo klousura
Ta klousurá e siman kreativo na un manera festivo ku un festival di talento riba djasabra 11 di òktober for di 17:00 or te 19:00 or. E ora ei tur partisipante ta haña un oportunidat pa presentá nan obra i nan talento na públiko.
“Nos ke duna nos muchanan i nos hóbennan un oportunidat pa deskubrí nan talento artístiko i eksperensiá esaki mesora tambe riba esenario. Na mes momentu nos ta brinda organisashonnan i personanan ku ta sostené hóbennan den nan desaroyo di talento un posibilidat pa laga tur hende sera konosí ku nan servisionan,” segun Boneiru su coach di kultura, Segni Bernadina.
Inskribí
Tur mucha i hóben ku ke partisipá na Arte ta topa Regata por inskribí via:
- E formulario di inskripshon online: https://forms.gle/Z2uKcg4SUcumYXxt7
- E QR-code riba e página di Facebook Sekshon Kultura Arte i Literatura
- Email: cultuurcoachbonaire@gmail.com òf SKAL@bonairegov.com
