E diputadonan Cicilia i Den Heyer a habri e Konferensia di Trabou “Ehekushon Proyekto Bibienda Pagabel” ofisialmente. E enkuentro akí ta marka un paso importante den realisashon di bibienda pagabel pa komunidat boneriano.
Proyekto ambisioso di Konstrukshon di Bibienda
Konseho Insular den e Nota Maneho di Tereno 2022 – 2025 a stipulá ku mester konstruí bibienda pagabel ku urgensia. Esaki a kondusí na e plan Proyekto Bibienda Pagabel, ku tin komo meta pa konstruí 2100 bibienda pagabel den e periodo di 2024 – 2030. E Ministerio di Bibienda Públiko i Ordenamentu Teritorial (Volkshuisvesting en Ruimtelijke Ordening – VRO) a primintí ku nan lo ko-finansiá e proyekto akí.
Preparashonnan ta den pleno marcha
E preparashonnan pa e proyektonan di kontrukshon di bibienda ya kaba ta den pleno marcha. Kolegio Ehekutivo ta kla pa pone e último pasonan pa kuminsá ku e fase di ehekushon den e áreanan di Rincon Pariba i Dawari, kaminda nan ta bai traha en total 210 bibienda.
Presentashon di Plan di Desaroyo Urbano
Durante e Konferensia di Trabou e mènedjer di programa Raymond Begina a entregá e plannan detayá di desaroyo urbano pa Rincon Pariba i Dawari na e diputadonan Cicilia i Den Heyer. Manera ta preskribí den Maneho di Tereno 2022 – 2025, lo presentá e plannan akí na Konseho Insular pa aprobashon promé.
Kolaborashon pa bibienda pagabel
Diputado Cicilia a pone énfasis riba importansia di kolaborashon: “Nos ta kontentu ku tantu stakeholdernan interno komo eksterno a primintí di hasi nan máksimo esfuerso pa realisá bibienda pagabel pa nos hendenan.” Kolegio Ehekutivo ta spera, pa huntu ku tur e partidonan enbolbí, hasi e proyekto importante akí un éksito.
Siguiente pasonan
Awor Kolegio Ehekutivo ta bai presentá e áreanan di eksplotashon Rincon Pariba i Dawari na Konseho Insular. Ku esaki e ehekushon real di e Proyekto Bibienda Pagabel ta bini un paso mas serka. E partidonan enbolbí ta traha duru pa sòru ku konstrukshon di bibienda pagabel por ranka sali rápidamente.
