Djaweps 17 di òktober 2024 tin e evento ‘Anochi Ku Luna Yen’ di 19:00 or – 21:00 or na porta di Parke Washington ku e tema ‘Historia di Ser’i Bentana.’ George ‘Kultura’Thodé ta papia e anochi akí di e tragedia ku a tuma lugá na aña 1954. Tabata un anochi ku masha mal tempu mes i werlek a mata un dje dos trahadónan ku tabata traha na e faro ku tin riba e seru. E otro trahadó a logra bula for di e faro i a keda na bida.
Anochi ku Luna Yen’ ta un evento ku entre otro deklamashon di poesia, kontamentu di kuenta den lus di luna. E ta un un evento sosial di pueblo i pa pueblo, pues un i tur ta kordialmente bonbiní. Ta un di e aktividatnan ku Sekshon di Kultura, Arte i Literatura, SKAL, tin den su agènda kultural.
Hende di Playa ku tin mester di transporte, pa bai Parke Washington, por hasi uso di un bùs. E bùs ta sali 18:30 for di SKAL rumbo pa Rincon. Ta pidi tur esnan ku ke hasi uso di e servisio di bùs, pa reservá na tempu na SKAL òf yama +599 715 5323. Asina por tene kuenta ku e kantidat di hende ku tin mester di transporte.
Manera semper, ta keda liber na kada bishitante pa trese algu di boka dushi pa kompartí ku otro bishitante. Ta supliká tur hende bini ku nan propio stul. No balotá bo talento i bin demostrá ku bo por. Nos ta apresiá i respetá tur presentashon pero tin sierto regla sí. Nos no ta tolerá palabra bulgar, politikeria, atake personal i tur otro kos ku no ta kuadra ku meta di e evento.
Anochi ku Luna Yen ta un inisiativa ku a nase den pasado for di algun siudadano ku gran pashon pa nos idioma papiamentu. SKAL ta keda pone énfasis ku meta prinsipal di e evento ta pa stimulá otro pa skirbi, deklamá, konta kuenta, kanta òf presentá obranan kòrtiku na papiamentu.
Pa mas informashon por tuma por tuma kontakto ku kolaboradónan:
Magali Sumter +599 9 565 0947
Ubaldo Anthony +599 717 4935
Orlando Francisca 599 786 2131 òf +599 7962131
SKAL +599 715 5323
