Departamento di Salubridat Públiko ta kompartí e desaroyonan mas importante riba tereno di malesanan infeksioso den e di dos kuartal di aña 2025. Den e aktualisashon akí ta dediká atenshon na dengue, rebultashon di kueru serka mucha yòn, bakunashon pa biahero i infekshon di trakto respiratorio, manera grip i COVID-19. E sifranan i señalnan ta yuda nos keda alerta i tuma medida apropiá na tempu. Wak akinan pa e aktualisashon kompleto.
Den e di dos kuartal di aña 2025 ménos hende a bai nan dòkter di kas ku keho di un malesa di sangura, manera dengue. Notabel ta ku te ainda tur siman tin hende ta haña dengue, miéntras ku den e periodo tras di lomba tin ménos yobida.
E kantidat di mucha (0 pa 4 aña) ku a bai nan dòkter di kas ku keho di rebultashon di kueru, den e kuartal akí tabata algu mas ku den e lunanan yanüari te mart. Den kaso di un sospecho di un brote na un krèsh òf akohida pa mucha, manera malesa di man, pia i boka òf sende paga, GGD Boneiru ta investigá esaki i ta duna konseho tokante medidanan apropiá. Ta importante pa méldu sierto sospechonan na tempu serka GGD.
Te ainda e brote di e vírùs di kentura hel ta andando na Suramérika. Na kuminsamentu di luna di yüni un biaha mas GGD Boneiru pa medio di un komunikado di prensa a trese e bakunashon kontra kentura hel bou di atenshon di biaheronan ku ta bai Suramérika.
Internashonalmente nan ta vigilando un variante nobo di SARS-CoV-2., e NB.1.8.1 (‘Nimbus’). No tin informashon konosí si e supvariante akí ta hasi hende mas gravemente malu (fuente: WHO).
GGD Boneiru ta sigui vigilá e situashon rònt di malesanan infeksioso minusiosamente i ta hasi un yamada riba nos habitantenan pa keda alerta, prinsipalmente durante temporada di áwaseru i ora di hasi biahe (internashonal). Den kaso ku tin pregunta òf si ta deseá mas informashon, tuma kontakto ku GGD Boneiru via www.bonairegov.com òf via +599 715 5324.
