Viktimá i testigunan di violensia domestiko i maltratu di mucha ta bai haña guia serka personanan ku a sigui un estudio kon pa yuda i guia na un manera profeshonal den e kasonan aki. A prepará seis persona ku ta bira Funshonario di Atenshon Violensia Doméstiko i Maltrato di Mucha (FAVDMM). Nan ta sòru pa den un kaso sospecho di violensia doméstiko i maltrato di mucha e prosedura di entre otro duna keho òf buska ayudo kana bon.
E funshonarionan a sigui un treinen di tres dia pa siña kon señalá maltrato di mucha. Tambe nan a siña e plan pa kon laga otronan papia di Violensia Doméstiko i Maltrato di Mucha. Nan a siña tambe kon pa mustra e kaminda pa duna kuido i duna sosten na mayor i yu. Durante e treinen a trata tambe kon pa kumpli ku nan ròl komo funshonario di atenshon. Ta a base di e ròl akí nan por konsehá, sostené i traha huntu ora ku tin señal di Violensia Doméstiko i Maltrato di Mucha. Durante e treinen nan a papia tambe tokante kiko ta nesesario pa implementá trahamentu ku e plan na skol. Sinku ‘casemanager’ di Sentro di Ekspertisio Enseñansa i Kuido (Expertisecentrum Onderwijs en Zorg - EOZ) i un ámtenar di EPB a risibí nan sertifikado komo funshonario di atenshon.
Entidat Públiko Boneiru (EPB) a pidi esnan ku ta duna kuido pa formulá un maneho di Violensia Doméstiko i Maltrato di Mucha. A tradusí e Kódigo di Mèldu manera e tin na Hulanda pa e situashon boneriano den un Plan den Etapa pa Violensia Doméstiko i Maltrato di Mucha. Despues a forma nuebe treiner di e kadena pa trein nan koleganan pa bira funshonario di atenshon.
E skolnan ku e funshonarionan di atenshon di Sentro di Ekspertisio Enseñansa i Kuido (EOZ) ta traha huntu kuné tambe lo haña tayer di parti di e treinernan kapasitá di kadena tokante Violensia Doméstiko i Maltrato di Mucha. Asin’ei ta hisa nan konosementu tokante Violensia Doméstiko i Maltrato di Mucha i pa siña señalá esaki. Den futuro lo ofresé e treinen aki tambe na krèshnan. E meta prinsipal ta pa, den koperashon ku instansianan, stòp e violensia for di den un fase tempran.
