Pa islanan chikitu manera Boneiru, kaminda agrikultura tradishonal konosé su desafionan, laman ta hunga un ròl krusial den ekonomia i produkshon di kuminda. Pa suprayá e importansia akí, departamento di Agrikultura, Krio di Bestia i Peskeria (LVV) riba djárason 13 di novèmber a presentá e promé resultadonan di nan investigashon sientífiko di peskeria na nos piskadónan i públiko. Mas ku 50 interesado tabata presente na e enkuentro na Captain Don’s Habitat.
Konosementu di populashon di piská i monitoreo
Durante e presentashon Dr. Dolfi Debrot di Wageningen Marine Research (WMR) a duna splikashon tokante e informashonnan ku nan a kolektá i kon ta usa matemátika biológiko pa monitoriá populashon di piská den transkurso di tempu. El a pone énfasis riba e diferensia entre espesienan di piská di fondo lokal i piská pelágiko, esta piská di laman afó, ku ta migra.
Investigashon ta pone un base pa futuro di sektor di peskeria
LVVN (Landbouw, Visserij, Voedselzekerheid en Natuur – Agrikultura, Peskeria, Siguridat di Kuminda i Naturalesa) for di e aña akí ta finansiá e investigashon ku LVV i WMR (Wageningen Marine Research) ta hasi. E investigashon akí ta enfoká riba dokumentashon di e sektor di peskeria i ponementu di un base sólido pa desaroyo di esaki. Un di e preguntanan di mas importante ta kua i kuantu piská nan ta kue. E informashonnan akí ta esensial pa proba e importansia ekonómiko di e sektor i pa salbaguardiá un maneho sostenibel.
Sobrepeska i desafionan internashonal
E sektor di peskeria den área karibense ta konfrontá vários desafio pa motibu di sobrepeska di parti di otro paisnan, loke ta kondusí na populashonnan di piská ku ta birando mas skars. Den futuro tratadonan internashonal tokante kuota di peskeria (TAC: Total Allowable Catch – e kantidat total ku ta pèrmití) ta bai hunga un ròl mas grandi. Boneiru mester por supstansiá su posishon i e importansia di su sektor di peskeria ku sifra, pa por mantené un parti hustu.
Gradisimentu na nos piskadónan i na públiko
LVV ta pone énfasis riba importansia di informashonnan plousibel pa yuda e sektor bai dilanti. Sin e sifranan akí desaroyo di e sektor di peskeria ta keda stagna. Pa e motibu akí LVV ta ekspresá su gratitut na nos piskadónan i na públiko pa nan enbolbimentu i kolaborashon ku kolekshon di informashon esensial.
Ku e esfuerso konhunto akí Boneiru por edifiká un sektor di peskeria sostenibel i ekonómikamente fuerte.
