A kompletá e promé tanda di e kòmbersashonnan di mesa di klima na Boneiru eksitosamente. Den luna di mart i aprel mas ku 20 stakeholder enbolbí a traha intensivamente huntu pa deliberá tokante e konsekuensianan di kambio di klima. E resultadonan di e kòmbersashonnan akí ta forma un aporte importante pa e Intenshon di Klima ku mester keda formulá i e Plan di Klima ku ta bini despues di esaki.
Pa kada seshon e partisipantenan por a skohe kua ta e áreanan manera Awa, Naturalesa, Infrastruktura òf Kultura, Traha i Biba ku ta hala nan atenshon mas tantu. Sinembargo rápidamente a bira evidente kon estrechamente e áreanan ta konektá ku otro. Pa e motibu akí diferente stakeholder a skohe pa partisipá na vários seshon òf asta na tur e seshonnan. E partispashon amplio ta suprayá ku kambio di klima ta afektá nos tur i ku un aserkamentu konhunto i integral ta nesesario.
E kòmbersashonnan ta marka un promé paso importante den direkshon di un vishon pa Boneiru ku sosten amplio – un vishon ku finalmente gobièrnu lo sigui desaroyá mas aleu. E enbolbimentu aktivo di e partisipantenan i nan disponibilidat pa traha huntu riba solushon, ta proba ku e tema ta biba serka e hendenan ku ta komprometé nan mes pa logra un Boneiru habitabel i resiliente pa futuro.
Di dos tanda eksitoso ku organisashonnan mas chikitu
Dia 6 i 13 di mei un di dos tanda di kòmbersashon di mesa di klima a tuma lugá, ku enfoke riba organisashonnan i empresanan mas chikitu. E enkuentronan akí tambe a kana eksitosamente. Ku sosten di Kámara di Komèrsio – ku via medionan sosial a hasi un yamada pa partisipashon – mas ku 18 stakeholder a partisipá na e seshonnan. E aserkamentu tabata mas kompakto, pero tambe mas interaktivo, i esaki a keda risibí positivamente.
Pasonan di kontinuashon: komunidat ta sentral
Den luna di yüni e kòmbersashonnan di mesa di klima ta ranka sali den e barionan, den kolaborashon ku lidernan di bario, akseso i polisnan di bario. Banda di esaki un kòmbersashon spesial di mesa di klima ta tuma lugá ku hóbennan: ta enbolbí tantu alumnonan di enseñansa avansá komo di grupo 7 i 8 di e skolnan basiko ku esaki. E grupo di proyekto ta haña ku ta di gran importansia pa skucha bos di komunidat. Pa e motibu akí den e periodo binidero miembronan di mesa di klima lo drenta aktivamente den e barionan pa kòmbersá ku e habitantenan. Di e manera akí tur hende ta haña oportunidat pa kompartí nan ideanan, preokupashonnan i eksperensianan tokante kambio di klima i tokante esaki su konsekuensianan pa nan bida diario.
Presidente Nolly Oleana ta hasi un yamada na nos poblashon:
‘Mi ta hasi un yamada riba tur hende pa yuda nos pensa i pa laga tende nan bos. Kambio di klima ta afektá nos tur. Solamente huntu nos por edifiká un Boneiru habitabel i resiliente.’
Nos isla, nos responsabilidat. Djòin nos.
