Gezaghèber a informá Konseho Insular tokante resultado di e investigashon di echo i e investigashon di kontinuashon relashoná ku dunamentu di pèrmit i e paro di konstrukshon ku a imponé riba tata di e anterior diputado Cicilia. For di e investigashon a resultá ku no tabatin kestion di konflikto di interes, influensiamentu òf faboresimentu di parti di e anterior diputado.
Den luna di mei di e aña akí nan a kuminsá ku e investigashon di echo despues di e paro di konstrukshon ku Direktorado di Supervishon i Mantenshon di Lei a imponé. Kolegio Ehekutivo a disidí pa hasi e investigashon akí, pa motibu ku e tempu ei eks diputado Cicilia tabata responsabel pa e kartera di Planifikashon i Desaroyo i pa motibu ku tabata trata di un miembro di famia.
Meta di e investigashon tabata pa duna klaridat tokante e proseduranan relashoná ku e dunamentu di pèrmit i e medidanan di mantenshon di lei, i pa evitá ku por a surgi un aparensia di konflikto di interes. Despues di e investigashon di echo Gezaghèber a duna enkargo pa un investigashon di kontinuashon pa klarifikashon adishonal riba algun punto.
Un ofisina di investigashon regional ku eksperensia den investigashon forénsiko i investigashon di integridat a hasi e investigashon di echo i di kontinuashon. E konklushonnan ta mustra ku no tin indikashon ku e anterior diputado a influensiá e prosedura.
Ku kompartimentu di e resultado, Gezaghèber ta spera ku tin klaridat pa tur partido enbolbí, ku e proseso por sirbi komo un lès pa siña for di dje, i ku e resultado akí ta fortifiká e konfiansa den manera di aktua di entidat públiko Boneiru.
