Gezaghèber a disidí pa inisiá un rekonstrukshon di echo relashoná ku e toma di desishon rònt di transakshon di terenonan den e área di Santa Clara. Ta ehekutá e rekonstrukshon pa motibu di preguntanan i inklaridatnan resien ku a surgi rònt di diferente desaroyo den e área di Santa Clara. Gezaghèber ta enfatisá ku ta importante pa determiná e echonan akí kuidadosamente i independientemente, di manera ku ta bini klaridat pa tantu gobièrnu i e organisashon atministrativo, komo pa habitantenan di Boneiru.
Den e simannan tras di lomba tabatin hopi atenshon polítiko i sosial pa diferente desishon di Kolegio Ehekutivo tokante transakshon i emishon di terenonan den e área di Santa Clara. Miembronan di Konseho Insular a hasi pregunta tokante esaki i tabatin preokupashonnan ku a keda ekspresá públikamente si sierto desaroyonan ta kana den liña ku e prinsipionan di bon gobernashon i transparensia.
E diskushon polítiko a kondusí na insiguridat i inklaridat serka nos poblashon tokante ehekushon di tareanan atministrativo den e fail akí.
‘Konfiabilidat di gobièrnu di Boneiru ta forma fundeshi di e estado di derecho demokrátiko i mester keda semper salbaguardiá. Pa e motibu akí mi a disidí pa ehekutá un rekonstrukshon di echo tokante e manera ku kosnan a kana for di kuminsamentu di e fail ‘Santa Clara’. E rekonstrukshon akí mester pone e echonan riba mesa, di manera ku tin trankilidat, klaridat i un base real pa eventual pasonan di kontinuashon,’ segun Gezaghèber.
Kiko e rekonstrukshon akí ta kontené?
Ta identifiká e echonan, desishonnan, pasonan di proseso i responsabilidatnan den e fail di Santa Clara. Un ofisina di investigashon eksterno i independiente ta ehekutá esaki den kolaborashon ku e Ofisina di Integridat di entidat públiko Boneiru. Den esaki ta investigá ki dia e trayekto rònt di Santa Clara a kuminsá, kua ta e desishonnan ku a tuma i ken a tuma nan, kua ta e partidonan ku tabata enbolbí i kon e prosesonan ofisial i atministrativo a kana.
E investigashon ta enfoká riba un evaluashon independiente di e manera ku e proseso a kana i riba dunamentu di rekomendashon pa den futuro fortifiká bon gobernashon. Si for di e investigashon bini señalnan dilanti ku ta duna motibu pa esaki, por kuminsá ku un investigashon di kontinuashon.
Gezaghèber ta pone énfasis riba importansia di un ehekushon rápido i kuidadoso. Despues di finalisashon di esaki ta hasi e konklushonnan públiko i ta kompartí nan ku Kolegio Ehekutivo, Konseho Insular i habitantenan di Boneiru.
