Komo parti di e plan di mantenshon di infrastruktura, a finalisá un di e proyektonan ku ta Kaminda Lagun. Den e proyekto a skohe konsientemente pa atendé ku e tres partinan ku prioridat di mantenshon mas haltu promé. Den un próksimo trayekto lo kontinuá ku e otro partinan, kual a base di e situashon di e kaminda ta implementá e medida di mantenshon nesesario.
E trabou ku a ehekutá ta forma parti di e programa regular di mantenshon, kaminda na un manera dirigí ta invertí den e kamindanan ku tin mester di atenshon mas urgentemente.
Direktor interino Ligwino Leito ta pone énfasis riba importansia di e aserkamentu akí: "Pa medio di atendé promé ku e partinan ku prioridat mas haltu, nos ta sòru mesora pa mas siguridat riba kaminda. Seguidamente nos ta sigui traha paso pa paso riba mas mehorashon, di manera ku den un forma duradero nos ta fortifiká kalidat di nos infrastruktura."
Direktorado di Planifikashon i Desaroyo ta sigui komprometé su mes pa mantenshon i mehorashon di e ret di kaminda na Boneiru.
