A finalisá kuater kaya na Tanki Matrimonio i e trabou ta kontinuá

E promé resultadonan di e proyekto di infrastruktura na Tanki Matrimonio ta visibel. A finalisá e trabou di asfaltamentu di kuater kaya eksitosamente. Entidat Públiko Boneiru ta sigui invertí den barionan seif, sostenibel i bon alkansabel.

Dentro di e proyekto nos ta asfaltá diferente kaya na Tanki Matrimonio i nos ta sòru pa un sistema mehorá pa desagwe di awa di yobida. Ku esaki nos ta mehorá alkansabilidat den e bario i nos por atendé mas mihó ku molèster di awa ora áwaseru kai.

Entretantu nos a finalisá e trabou na Kaya Bazinia, Kaya Gobi, Kaya Zjar i Kaya Trepochi. Mesora despues di esaki nos a kuminsá ku e trabou den Kaya Fogon i Kaya Stèlchi, kaminda aktualmente nos ta trahando riba asfaltamentu i desagwe.

Direktor interino Ligwino Leito ta aksentuá importansia di e proyekto: ‘Ku e proyekto akí, Entidat Públiko Boneiru ta trahando paso pa paso pa logra un mihó infrastruktura, mas siguridat den tráfiko i un ambiente di biba mas agradabel pa habitantenan di Tanki Matrimonio.’

Trabou den un bario residensial temporalmente por okashoná molèster. Pa e motibu akí Entidat Públiko Boneiru ta gradisí tur habitante i usuario di kaminda di Tanki Matrimonio pa nan komprenshon, pasenshi i koperashon durante ehekushon di e proyekto akí.

Entidat Públiko Boneiru ta sigui informá komunidat tokante progreso di e proyekto. Pa esaki, sigui e kanalnan ofisial di Entidat Públiko Boneiru.