Trabounan na e sitio di stashoná outo na skol Rayo di Solo a finalisá. Ku realisashon di e fasilidat akí, fluho di tráfiko i e siguridat a mehorá signifikantemente pa e usuarionan: nos muchanan, mayornan i empleadonan ku ta bishitá e skol akí.
E trabounan, ku a kuminsá na fin di 2025, tabata na enkargo di Direktorado di Planifikashon i Desaroyo di Entidat Públiko Boneiru (OLB) i realisá pa e kontratista Bonaire Infrastructuur. E meta prinsipal di e proyekto akí ta pa organisá e sitio di tal forma kaminda ta indiká klaramente e sitionan designá pa stashoná outo i sitionan designá pa kanamentu/peaton.
Banda di e mehorashon den fluho di tráfiko, durante di e konstrukshon di e sitio di parkeo akí a atendé tambe ku e desague den e área. Esaki ta garantisá aksesibilidat na e skol i ta eliminá molèster di lodo i awa despues di yobida.
Durante e proyekto a traha estrechamente huntu ku e alumnonan ku ta forma parti di e konseho di alumno di e skol aki. E alumnonan a kompartí nan eksperensianan i e puntonan di atenshon di antemano. E enbolbimentu akí a kontribuí na un solushon ku ta konektá mas mihó ku e práktika diario di e ambiente di skol.
Komo un muestra di apresio pa nan esfuerso i pa enkurashá nan pa keda aktivamente enbolbí den e konseho di alumno, Entidat Públiko Boneiru a entregá nan un martin di presidente ku nan por uza durante di nan reunionnan pa sigui representá tur alumnonan di e skol debidamente.
Entidat Públiko Boneiru ta sigui komprometé su mes pa mehorashon di siguridat di tráfiko na Boneiru, ku atenshon spesial pa ambiente di skol.
