75% di hende ku por bakuná a pasa e promé angua

Na Boneiru 75% di e hendenan ku por pasa angua kontra korona a pasa minimalmente un (1) angua.

Antonio José Cabrera ta e di diesmil persona ku a haña su di dos angua kontra corona, esei tabata mas o ménos un siman pasá. Portrèt: EPB

Kralendijk – Na Boneiru 75% di e hendenan ku por pasa angua kontra korona a pasa minimalmente un (1) angua. En total 18.944 hende di 18 aña bai ariba ta bini na remarke pa pasa angua kontra corona. Te ku djaweps 3 di yüni 14.230 hende a pasa minimalmente un (1) angua. E kantidat di hende ku a pasa e promé i e di dos angua, awor akí ta 11.333.

For di febrüari di e aña akí departamento di Salubridat Públiko a kuminsá ku pasamentu di angua kontra corona. Den e último lunanan hendenan por a pasa angua na diferente sitio. Por ehèmpel habitantenan di bario a pasa angua den bario di Antriol, Amboina, Nort’i Saliña, Rincon i Tera Kòrá den sentro di bario. For di kuminsamentu Kompleho Deportivo Jorge Nicolaas na Playa tabata un sitio sentral pa pasa angua, kaminda tabata pasa angua durante henter siman.

For di djamars 8 di yüni te ku djaweps 10 di yüni ta posibel pa pasa e promé angua kontra corona sin sita na Kompleho Deportivo Jorge Nicolaas. Por hasi esaki riba e dianan ei for di 09:00 – 14:00 or. Pa pregunta tokante pasamentu di angua òf pa traha un sita pa pasa angua suidadanonan por yama e number grátis 0800 0900.