‘Un yabi ku ta pega na bo skouder’ òf ‘un chip di 5G ku ta inyektá den bo kurpa’, ta algun di e pensamentunan robes ku a bini dilanti durante seshon di informashon pa hòbennan. Despues di a haña informashon korekto di ekspertonan, sinkuentikuater alumno di MBO a registrá i a kuminsá bakuná.
E hóbennan a partisipá boluntariamente na seshon di informashon
pa papia di idea ku ta reina tokante e bakuna. Meta di e seshonnan tabata pa kombersá ku e hóbennan i informá nan korektamente. Departamento di Komunikashon di Entidat Públiko Boneiru a organisá e enkuentronan.
E hóbennan a trese nan pensamentunan dilanti tokante e bakuna kontra e vírùs di corona. Mayoria informashonnan nan ta haña riba retnan sosial. Hopi biaha e ideanan akí no ta kuadra ku realidat. Por ehèmpel e idea ku den e bakuna tin un chip di 5G. Òf e idea ku e bakuna ta malu, pasobra e ta pone ku una bes bakuná, yabi ta keda pegá na kurpa. Tin hóben ta kere tambe ku e bakuna ta afektá fertilidat, ke men ku nan no por haña yu fásilmente despues di bakuná.
Durante e enkuentronan e hóbennan por a hasi pregunta na un dòkter ku tabata presente. Departamento di Komunikashon ta satisfecho ku despues di e enkuentronan informativo, sinkuentikuater hóben a skohe pa nan bai bakuná. Na tur tin 93 alumno di MBO a partisipá na e seshonnan. E departamento ta organisá pronto mas aktividat tokante bakunashon kontra corona pa hóbennan.
