Proyekto Protehá Mi: Fontein
E proyekto di ‘Protehá mi’ a kuminsá na aña 2025 pa protehá e patrimonio boneriano riku. Durante e tayernan arkeológiko di aña pasá nos a puntra e partisipantenan di ki manera nan ta haña ku mester protehá e patrimonio boneriano i kua ta e sitionan ku nan konosé kaminda posibelmente tin sitio di hayasgo arkeológiko, pa por protehá esakinan mas mihó. E partisipantenan por a indiká sitionan ku por a keda investigá pa medio di inspekshon arkeológiko den vèlt.
E tipo di investigashon akí ta enfoká riba konservashon, kaminda tòg por kolektá informashon tokante e grandura, e kalidat i e kantidat di aña di e sitionan akí na Boneiru. Durante e inspekshonnan den vèlt akí e partisipantenan ta siña kon ta ehekutá inspekshon arkeológiko den vèlt i trabou na sitionan di hayasgo arkeológiko. Banda di esaki nan ta haña informashon tokante ophetonan ku por haña na Boneiru i konhuntamente nos ta deliberá tokante kon nan ta haña ku por protehá e patrimonio akí mas mihó na Boneiru.
Bo ke partisipá pa protehá patrimonio boneriano mas mihó? Registrá rápidamente, pasobra e lugánan ku ta disponibel ta limitá!
