Purpose of this campaign
Fiesta di Salú ta un evento di salú edukativo ku GGD Bonaire/Salubridat Públiko ta organisá. Meta di Fiesta di Salú ta pa laga muchanan sera konosí na un manera positivo i interaktivo ku alimentashon saludabel, bebementu di awa i aktividat físiko. Ta organisá e evento na tur skol básiko di Boneiru. Fiesta di Salú ta parti di e kompromiso mas amplio di GGD Bonaire/Salubridat Públiko pa promové eskoho saludabel, igualdat di oportunidat i un desaroyo saludabel di mucha.
Salú di un forma dibertido i interaktivo
Durante Fiesta di Salú alumnonan ta partisipá na vários aktividat den kua salú ta sentral. E ekipo di Bon Salú i weganan konosí ta yuda muchanan pa na un manera dibertido i rekonosibel, nan siña mas tokante eskoho saludabel. Pa medio di wega, moveshon i enkargonan edukativo, nan ta siña mas tokante kuminda saludabel, bebementu di awa i eskohonan saludabel den bida diario. E aktividatnan ta konektá ku mundu di mucha i ta hasi edukashon tokante salú aksesibel, komprendibel i dibertido.
Atenshon èkstra na edukashon
Den 2026 ta pone mas énfasis na e balor edukativo di e evento. Ku storia, enkargo interaktivo i aktividat edukashonal komplementario, no solamente durante e evento, sino tambe pafó di esei, ta reforsá mensahenan di salú. Ku esaki GGD Bonaire/Salubridat Públiko ke kontribuí na konsientisashon duradero i desaroyo di kustumbernan saludabel na edat yòn.
Fiesta di Salú + Cyclovia
1 di novèmber 2026 ta konkluí Fiesta di Salú festivamente durante Cyclovia. Muchanan ku a partisipá promé na Fiesta di Salú ta haña oportunidat pa eksperensiá e evento di nobo huntu ku nan famia i otro bishitante. Durante e edishon akí, no solamente mucha, sino tur habitante di Boneiru ta bonbiní pa partisipá na vários aktividat relashoná ku salú.
Kolaborashon pa un futuro saludabel
Ta organisá Fiesta di Salú den kolaborashon ku skolnan básiko i partnernan sosial na Boneiru. Kombinando konosementu, plaser i enkuentro, e evento ta kontribuí na un futuro saludabel yen di oportunidat pa mucha.