Informashon general

Boneiru ta un munisipio spesial (entidat públiko) di Hulanda den e parti karibense di Reino. Den e último añanan su poblashon a krese fuertemente: di 15.000 na aña 2010 pa mas ku 25.000 na aña 2024. Esaki ta krea retonan spesífiko: espasio skars i karu, preshon riba skol, kuido i utilidat, un maneho vulnerabel di awa i naturalesa i problemanan di mobilidat ku ta oumentando.

Kaminda Boneiru pa loke ta trata kantidat di habitante ta komparabel ku un munisipio hulandes chikitu, pa loke ta trata reto nos isla ta komparabel ku e siudatnan grandi. Boneiru ta disponé di un aeropuerto internashonal, un haf, un hòspital, un propio kuerpo polisial i un propio kuerpo di bombero, i un prison. Banda di esaki tur aña mas òf ménos 541.000 turista ta bishitá Boneiru, di kua mas òf ménos 360.000 ta yega ku barku krusero (informashon di aña 2024).

E prosperidat amplio ta bou di preshon, debí na e poblashon ku ta kresiendo rápidamente, turismo, kosto di bida ku ta oumentando i e preshon riba e diferente fasilidatnan i infrastruktura. Regio Deal Boneiru ta fortifiká kalidat di bida, bibienda i empleo ku invershonnan integral ku ta pone ekonomia, kultura, enseñansa, mobilidat i medio ambiente den ekilibrio.    

Reto

Boneiru ta kresiendo i kambiando ku un velosidat haltu. Esaki ta brinda oportunidat, pero e ta pone preshon tambe riba mobilidat, e áreanan rònt di skol, maneho di awa i naturalesa, i koherensia sosial. E reto ta pa guia e desaroyo akí ku medidanan ku ta kuadra ku un isla ku funshonnan di un siudat grandi i un eskala di un pueblo chikitu.

Ku Regio Deal nos ta traha aktivamente riba rutanan i plenchinan di skol seif i atraktivo i den fase nos ta implementá transporte públiko ku konekshonnan lógiko i puntonan sentral di mobilidat. Den un área ku desafio di desagwe, nos ta mehorá e maneho di awa i nos ta sòru pa e awa ta benefisioso pa desaroyo agríkola. E punto di konekshon ku falta ta bira un Sentro Multifunshonal: un sitio pa desaroyo ekonómiko, kultura, desaroyo di talento, edukashon, evento i enkuentro. Na mes momentu nos ta hasi e fluho di produkto mas seif i mas efisiente ku un sitio pa pone kònteiner den serkania di haf. E skolnan básiko ta haña panel solar ku bateria, di manera ku gastu di koriente ta bira ménos loke ta na benefisio di enseñansa i ta baha preshon for di e ret di koriente. E aserkamentu ta programátiko, ku un repartishon evidente den fase i un kolaborashon estrecho entre Entidat Públiko Boneiru, Reino i partnernan lokal.

Ambishon i aserkamentu

Regio Deal Boneiru konosé dos liña di programa:  

Konektividat i alkansabilidat

• Un Sentro Multifunshonal, un sitio sentral pa desaroyo ekonómiko, kultura, talento, funshon di kongreso i sitionan di trabou inklusivo; adishonal riba e uso ku enfoke riba bario di e sentronan di bario.
• Desaroyo di área ku intervenshonnan adaptativo na klima, manera un fasilidat pa almasená awa i mihó maneho di awa, ku ta benefisiá desaroyo agríkola tambe. Tambe ta krea un punto sentral di transporte públiko den e área akí.
• Infrastruktura rònt di e skolnan: medidanan den fase pa siguridat di tráfiko i áreanan atraktivo rònt di skol ku zonanan di ‘kiss & ride’ i rutanan pa kana i kore baiskel na un manera seif i sitionan pa stashoná outo.
• Transporte públiko: implementashon den fase ku rutanan prinsipal i puntonan sentral di mobilidat; ta kuminsá ku bùsnan konvenshonal i ta sigui traha den direkshon di elektrifikashon.  

Outosufisiensia

• Sitio pa pone kònteiner, logístika di produkto: un almasenahe sentral den serkania di haf pa siguridat, efisiensia i ménos gastu.
• Panel solar riba e skolnan básiko: instalashon ku bateria riba e skolnan, loke ta kondusí na kosto di bida mas abou i mehorashon di kalidat di enseñansa.

Partnernan i invershon

Un kolaborashon ta tuma lugá for di diferente direktorado di Entidat Públiko Boneiru ku Rijksdienst Caribisch Nederland (RCN), manera Servisio di Impuesto, Kuerpo Polisial Hulanda Karibense, Kmar i Kuerpo di Bombero Hulanda Karibense, pero ta enbolbí tambe por ehèmpel Tourism Corporation Bonaire, Bonaire Hotel & Tourism Association, e direktivanan di skol, MBO, hóbennan, i dunadónan grandi di trabou manera Fundashon Mariadal, Bonaire International Airport i e Kompania di Awa i Elektrisidat Boneiru (WEB), ku e Regio Deal akí.

Pa loke ta trata Reino, sinkronisashon ta tuma lugá ku e ministerionan enbolbí, manera Ministerio di Asuntunan Ekonómiko, Ministerio di Enseñansa, Kultura i Siensia, Ministerio di Asuntunan Interno i Relashonnan den Reino i Ministerio di Bibienda Públiko i Ordenamentu Teritorial.

Gobièrnu di Reino ta invertí un suma di € 13.000.000 den Regio Deal Boneiru