Q3 aktualisashon malesa kontagioso

Dengue

Den e di tres kuartal di aña 2024 (e lunanan yüli, ougùstùs i sèptèmber) na Boneiru nos tabatin hopi ménos kaso di dengue, kompará ku e lunanan anterior. Tabatin en total 5 kaso konfirmá. Esaki ta bon notisia! Pero ku e áwaseru di siman pasá, lo bini mas sangura atrobe. I mas sangura ta nifiká tambe mas chèns pa kontagio ku dengue. Pues paga bon tinu riba e sitionan kaminda sangura por pone webu, manera artefaktonan ku awa di yobida ta keda para aden. Eliminá e artefaktonan akí. Pa mas tep bo por wak riba www.bonairegov.com/pa/sangura. Si bo ta mira hopi sangura na kas òf na bo trabou, e ora ei tuma kontakto ku Salubridat Públiko via 715 5324.

Mpox

Den luna di ougùstùs nan a papia hopi tokante mpox na Boneiru. Mpox, ku ántes nan tabata yama tambe ‘monkeypox’ òf bruera sabí, ta un malesa ku ta aparesé prinsipalmente na paisnan afrikano. E ta duna keho manera kentura i blar riba kueru. Bo por hañ’é pa medio di kontakto íntimo. E aña akí nan a topa ku un variante nobo di mpox na Afrika Sentral. Te ku awor no a haña e variante akí ainda na Boneiru, ni na Hulanda Oropeo tampoko. E chèns ku na Boneiru nos lo haña nos enbolbí ku e forma nobo di mpox akí ta chikitu. Sí nos a pone dunadónan di kuido na altura di e síntomanan i nos a splika nan kiko mester hasi ora nan ta sospechá ku un hende tin mpox.

Kiko mas Salubridat Públiko ta hasi – deklarashon di salú di barku

Un parti di nos trabou ta pa purba sòru ku malesa no ta drenta Boneiru via barku. Rònt mundu kada barku tin ku yena un deklarashon di salú, promé ku e drenta un haf. Den e deklarashon tin pará si tin hende malu na bordo. Si tin hende ku un malesa kontagioso, nan ta informá Salubridat Públiko. E ora ei Salubridat Públiko ta wak e situashon i eventualmente ta duna e barku konseho.  Masha poko biaha por nenga un barku di drenta haf, pero esaki kasi nunka no ta sosodé. Den aña 2024 Salubridat Públiko te ku awor a risibí 148 deklarashon di salú, prinsipalmente di barku krusero. Kada biaha e kantidat di hende malu tabata abou i pa e motibu akí no tabata nesesario pa imponé medida spesial.