Un bista di e reglanan di tráfiko

Aki bou por mira un resúmen di tur regla ku ta drenta na vigor. Bo ta haña informashon tokante e reglanan akí via diferente medio. Bishitá e website akí regularmente pa keda bon informá di tur regla ku ta konta pa bo.

Regla nobo tokante velosidat

  • Artíkulo 57. Den un área residensial (bebouwde kom) e velosidatnan máksimo aki ta bálido:
  • Un outo, trùk òf otro vehíkulo di motor no mag kore mas duru ku 40 km pa ora.
  • Un bròmfits no mag kore mas duru ku 30 km pa ora.
  • Un skutmobil òf vehíkulo pa hende desabilitá no mag kore mas duru ku 30 km pa ora.
  • Artíkulo 58. Pafó di un área residensial (bebouwde kom) e velosidatnan máksimo aki ta bálido:
  • Un outo, trùk òf otro vehíkulo di motor no mag kore mas duru ku 60 km pa ora.
  • Un bròmfits no mag kore mas duru ku 55 km pa ora.
  • Un skutmobil òf vehíkulo pa hende desabilitá no mag kore mas duru ku 30 km pa ora.

Regla nobo tokante preferensia

  • Artíkulo 45 insiso 1. Na momentu ku bo ta kore outo, baiskel, skuter, motosaikel òf quad, semper bo mester duna e siguiente hendenan preferensia:
  • Hende ku no por kana bon.
  • Hende ku ta siegu òf ku no ta mira bon. Nan tin un garoti blanku ku un òf mas renchi kòrá.
  • Artíkulo 45 insiso 2. Na momentu ku bo ta kore outo, trùk, baiskel, skuter, motosaikel òf ‘quad’, bo mester duna tur hende riba un sitio pa krusa kaya (zebrapad) preferensia. Ta trata di peaton i hende den un vehíkulo pa hende desabilitá. Bo mester duna nan preferensia tambe ora nan ta kla pará pa krusa kaya.
  • Artíkulo 48. Ora bo ke subi un rotònde, bo mester duna tráfiko ku ta koriendo riba e rotònde kaba preferensia.

Regla nobo pa molèster

  • Artíkulo 64. Bo no tin mag di hasi zonido innesesario ku bo vehíkulo. Por ehèmpel dunando gas miéntras e klùch ta desakoplá (rèf).

Regla nobo tokante siguridat

  • Artíkulo 26A. Ta prohibí pa durante ku bo ta kore outo bo tin un telefon selular òf tablet den bo man.
  • Artíkulo 28. Ta prohibí pa manehá un vehíkulo si bo a bebe demasiado alkohòl òf si bo a usa droga.
  • Artíkulo 77 insiso 1.
  • Artíkulo 77 insiso 2. Mucha menor di 4 aña di edat òf mas yòn tin mag di bai komo pasahero den outo solamente  si nan ta sintá den un stul spesial pa mucha òf si nan ta sinta riba un opheto spesial ku ta hasi e asiento di outo mas haltu. E stul spesial pa mucha mester tin un etikèt di aprobashon.
  • Artíkulo 77 insiso 3. Tur shofùr i pasahero ku ta mas chikitu ku 1.50 meter, mester usa un faha di siguridat ku ta mara na hep. E outo tin solamente faha di siguridat di tres punta? E ora ei mester usa e faha di siguridat ei komo faha di siguridat ku ta mara na hep.
  • Artíkulo 78. Tur koredó i pasahero di un bròmfits, motosaikel òf quad mester bisti un hèlmu ku ta pas bon na nan kabes. Pa e hèlmu e siguiente reglanan ta válido.
  • Bo mester por sigurá e hèlmu na bo kabes ku un mekanismo spesial pa esei.
  • E hèlmu ta kumpli ku normanan di siguridat.
  • E hèlmu tin un marka di siguridat.
  • E hèlmu no ta kibrá òf ku daño na dje.

Regla nobo tokante sitio di parker pa hende desabilitá

  • Artíkulo 62. E vehíkulonan aki so tin mag di parker riba un sitio di parker pa hende desabilitá:
  • Un skutmobil òf vehíkulo pa hende desabilitá.
  • Un outo ku karchi di parker pa hende desabilitá bálido. E karchi aki mester ta bon visibel tras di e winshil.
  • Un vehíkulo pa kua e sitio di parker ta reservá.

Regla nobo tokante ken tin mag di kondusí un vehíkulo

  • Artikulo 100 insiso 2. Ta prohibí pa kore ku un bròmfits riba kaminda si bo tin ménos ku 16 aña.
  • Artíkulo 100 insiso 2. Bo tin 16 aña òf mas? E ora ei bo tin mag di kore ku un bròmfits riba kaminda si:
  • Bo tin un reibeweis bálido pa un vehíkulo di motor, òf
  • Bo tin un pèrmit bálido ku tin bo nòmber riba dje.
  • Artíkulo 100 insiso 4. Bo tin ménos ku 18 aña? E ora ei bo no mag kore riba kaminda ku un aparato ku ta kore. Por ehèmpel un kran of mashin di bari kaya.Bo tin mag di kore nan sí, si bo tin 18 aña òf mas.  Pero e ora ei bo mester tin reibeweis B, C òf D bálido si.
  • Artíkulo 109. Tur reibeweis ta bálido durante 5 aña. E 5 añanan ta kuminsá konta riba e dia ku bo haña bo reibeweis.
  • Artíkulo 112 insiso 3. Bo a haña bo reibeweis na Hulanda, Aruba, Kòrsou, Sint Maarten, Sint Eustatius òf Saba? E ora ei bo reibeweis ta bálido na Boneiru tambe.
  • Artíkulo 33. Bo no tin mag di kondusí vehíkulo di un otro persona sin su pèrmit.

Regla nobo tokante ora a konfiská bo vehíkulo

  • Artíkulo 128 insiso 3. Bo no ta tene bo mes na reglanan di tráfiko? E ora ei polis por konfiská bo vehíkulo. E agente polisial ta kore bo vehíkulo hib’é un sitio kaminda ta ward’é.
  • Artíkulo 128 insiso 4. Bo ta paga e gastunan relashoná ku transporte i wardamentu di bo vehíkulo.