E preguntanan mas hasí

Kon ta pará ku wenshil skur?
Por lo pronto no ta kontrolá riba esei. Den lei di tráfiko ta pará awor aki ku glas di outo mester laga 70% di lus pasa. Konseho Insular a akseptá un moshon ku un proposishon pa adaptá e lei. Den e moshon Konseho Insular ta pidi Kolegio Ehekutivo pa investigá e proposishon aki. Den e teksto di lei di tráfiko no tabata klarito si ta trata di tur glas. Òf ku ta trata di solamente wenshil i e glasnan na banda parti dilanti. Ku e moshon a hasi un proposishon pa adaptá lei di tráfiko. Entretantu e proposishon aki a bai Konseho Insular pa tratamentu.

Hendenan riba baiskel tambe mester bisti hèlm?
Nò, hendenan ku ta kore baiskel no mester bisti hèlm. Koredónan di skuter, motosaikel i ‘quad’ mester bisti hèlm.

Hendenan mester laga kùr nan vehíkulo awor?
Boneiru no tin e posibilidat ainda pa por ehèmpel kùr òf laga kùr outo i motosaikel. Lei di tráfiko ta duna e posibilidat si pa kùr vehíkulo. Despues e artíkulonan aki ta bira vigente ora ku bira posibel pa kùr por ehèmpel outo.

Regla di tráfiko ta bálido pa turista tambe?
E reglanan di tráfiko ta bálido pa tur hende ku ta partisipá den tráfiko. Pues tambe pa turistanan riba nos isla.

Mi no tin faha di siguridat den mi outo, kiko mi tin ku hasi awó?
Tur outo trahá despues di aña 1986 mester tin faha di siguridat pa e asientonan dilanti. Pa e asientonan patras e obligashon ku mester tin faha di siguridat no ta konta. Tur shofùr i pasahero ta obligá pa usa e fahanan di siguridat presente. Ora ku den outo tin faha di siguridat pa e asientonan patras, ta obligatorio pa usa esakinan. Si bo no tin faha di siguridat den outo, bo por bestèl faha di siguridat na un negoshi kaminda nan ta bende piesa di outo. Preis di un faha di siguridat ta mas òf ménos 40 dòler.

Na unda mi por kumpra un stul spesial pa mucha i kuantu e ta kosta?
Preis di un stul spesial pa mucha ta varia di mas òf ménos $100 pa $300. Por kumpra  stul spesial pa mucha na e pakusnan grandi riba nos isla.

Tur pasahero den bùs grandi pa turista mester bisti un faha di siguridat?
Nò. Bùs grandi no mester tin faha di siguridat. Pasaheronan di bùs chikí òf taksi no mester bisti faha di siguridat si e reglanan pa transporte públiko ta bálido pa e bùsnan chikí òf taksi.

Hendenan ku ta kore riba un skuter elèktriko tambe mester bisti hèlm?
Si, hendenan riba un skuter elèktriko tambe mester bisti hèlm. Hendenan ku ta kore un baiskel ku un motor elèktriko ku ta hasi mandamentu di pia mas fásil, no mester bisti hèlm. Si e baiskel por alkansá un velosidat máksimo di 30 kilometer pa ora sin manda pia, e ora ei si nan tin ku bisti hèlm.

Na unda mi por haña un karchi di inválido pa parker na sitionan pa hende ku un limitashon físiko?
Ainda mester regla karchi pa hende ku un limitashon físiko. Na e momentunan aki ta investigando kuantu hende mester di un karchi asina. I tambe serka kua dòkter nan mester kùr pa haña un karchi di inválido. Asina ku tur kos ta reglá, via di medionan di komunikashon Entidat Públiko Boneiru ta informá kiko hendenan ku un limitashon físiko mester hasi pa yega na un karchi.

Komo konsekuensia di malesa mi ta hopi gordo. Un faha di siguridat ta primi mi kurpa hopi. Kiko mi por hasi?
Na un negoshi ku ta bende piesa pa outo bo por puntra si nan tin faha di siguridat ku ta mas largu ku nòrmal. Ta bon si bo midi largura di e faha di siguridat den bo outo. E ora ei bo por wak si tin faha di siguridat ku ta mas largu ku esun ku bo tin.