Kuminda di skol saludabel

Kuminda di skol saludabel 2026

Kuminda di Skol Saludabel (Gezonde Schoolmaaltijden) ta un inisiativa di Entidat Públiko Boneiru (EPB). E inisiativa ta bou di direkshon di GGD Bonaire / Salubridat Públiko i ta parti di e programa “Trahando na Prosperidat i Bienestar”.

Ku Kuminda di Skol Saludabel, nos ke pèrkurá pa tur mucha na Boneiru haña oportunidat pa krese  na un manera saludabel i desaroyá nan mes adekuadamente.  

Alimentashon saludabel ta importante pa mucha. E ta yuda nan pa krese bon, siña i keda aktivo. Ademas alimentashon saludabel ta yuda prevení problema di salú.  

Dikon Kuminda di Skol Saludabel?

Kuminda di Skol Saludabel ta ofresé kuminda saludabel na alumnonan di enseñansa básiko (4-12 aña) i enseñansa sekundario (12-18 aña).

Ofresiendo kuminda saludabel na skol, nos ke kontribuí na:

• un kresementu i desaroyo saludabel di muchanan;
• oportunidat igual pa tur mucha;
• mihó salú;
• mihó prestashon na skol;
• un estilo di bida saludabel.

Skolnan ta hunga un ròl importante den esaki. E kolaborashon ku skolnan na Boneiru ta hasi posibel pa yega na muchanan.

Kiko Kuminda di Skol Saludabel ta ofresé?

Tur dia alumnonan ta risibí fruta fresku na nan skol. Danki na e kolaborashon ku suministradónan lokal i otro sosionan, GGD Bonaire/ Salubridat Públiko ta sostené skolnan pa ofresé fruta salú na tur alumno.

E programa ta enserá:

• fruta fresku i variá tur dia pa mas o ménos 4300 alumno na enseñansa básiko públiko i enseñansa sekundario.
• Un desayuno mas saludabel pa alumnonan di Rayo di Solo, Strea Briante i Speciale Lesplaatsen di SGB.
• Supsidio pa Stichting Voeding Op School, pa ofresé kuminda di pan ku belèg pa alumnonan ku no por bai skol ku kuminda.
• Finansiamentu di kuminda kayente mas saludabel durante aktividatnan despues di skol.
• Kontribushon na e programa Bebe Awa, ku tin komo meta stimulá bebementu di awa i un estilo di bida saludabel.

Kon ta bai sigui ku e inisiativa?

E añanan ku ta bini, ta bai amplia Kuminda di Skol Saludabel gradualmente. Meta ta pa konvertí esaki den un inisiativa mas amplio pa kuminda i estilo di bida saludabel na skol.

Relashoná ku esei, nos ke entre otro:

• ofresé mas bèrdura i fruta lokal;
• enbolbí mayornan i kuidadónan mas, asina stimulá muchanan pa na kas tambe kome saludabel;
• stimulá kuminda saludabel i un estilo di bida saludabel durante aktividatnan na skol, manera Fiesta di Salú (di sèptèmber te ku novèmber) i aktividatnan di fakansi;
• sostené skolnan pa nan ofresé eskohonan mas saludabel den kantina.

Un ambiente di skol saludabel, nos ta krea huntu. P’esei GGD Bonaire / Salubridat Públiko ta traha huntu ku skolnan, suministradónan i otro sosionan. Huntu nos ta pèrkurá pa muchanan na Boneiru haña oportunidat pa krese na un manera saludabel i desaroyá nan mes mas mihó posibel.