BPV
Kiko ta Kontribushon Hür Partikular?
Kontribushon Hür Partikular ta un kompensashon pa hende ku ta hür un kas. Danki na Kontribushon Hür Partikular nan ta paga ménos hür. Kontribushon Hür Partikular ta un kontribushon pa hende ku un entrada abou ku ta hür un kas den sektor privá.
Kiko ta meta di Kontribushon Hür Partikular?
Na Boneiru kas den sektor privá kada dia ta bira mas karu. Pa siudadanonan ku un entrada abou tin ora ta difísil pa paga hür. Meta di Kontribushon Hür Partikular ta pa kas bira mas pagabel pa e hürdó, sin ku e doño di kas ta haña ménos sèn di hür. Kontribushon Hür Partikular ta un supsidio pa doñonan di kas. Gobièrnu ta paga e diferensia entre e preis normal di hür i e suma ku e hürdó por paga maksimalmente.
Pa ken Kontribushon Hür Partikular ta intenshoná?
Kontribushon Hür Partikular ta intenshoná pa famianan ku entrada abou i ku ta hür un kas den sektor privá.
Pa kua periodo e areglo akí ta konta?
Pa awor e areglo akí ta un proyekto piloto, e ta un prueba pa un tempu definí. Ku e proyekto piloto akí nos ta wak si den futuro kisas nos por implementá Kontribushon Hür Partikular pa un periodo mas largu. Hürdónan ku awor akí ta bini na remarke pa Kontribushon Hür Partikular, ta risibí esaki tanten ku e proyekto piloto ta dura. Temporalmente nan ta paga un hür mas abou.
Ken ta ehekutá e areglo?
Entidat Públiko Boneiru ta ehekutá e areglo. Ministerio di Asuntunan Interno i Relashonnan den Reino a pone sèn disponibel pa e ehekushon.
Kon ta hasi e petishon? Hürdó i doño di kas huntu
E hürdó i e doño di kas huntu ta hasi e petishon pa Kontribushon Hür Partikular. E doño di kas ta haña e kontribushon. E doño di kas ta kita e suma akí for di e hür di tur luna. E doño di kas pues ta keda risibí e mesun hür for di e hürdó, e hürdó ta paga ménos hür. E doño di kas ta haña un prima èkstra tambe di USD 50 pa luna, pa motibu ku e ta partisipá na e proyekto piloto, e prueba ku Kontribushon Hür Partikular pues. Pa medio di Kontribushon Hür Partikular, e doño di kas tin mas siguridat ku e hürdó por paga e hür. Meta di esaki ta pa evitá ku e hürdó ta hañ’é ku un retraso den pago di hür òf ku e tin problema pa paga e hür di kas.
Kiko e kontribushon propio pa Kontribushon Hür Partikular ta enserá?
Tur hende ku ta hür un kas i ku hasi petishon pa Kontribushon Hür Partikular, ta paga un kontribushon propio. E kontribushon propio ta dependé di bo entrada.
Kontribushon den kaso di sueldo mínimo òf mas abou
Bo tin sueldo mínimo òf un entrada mas abou ku sueldo mínimo? E ora ei bo ta paga $ 185,00 di kontribushon propio. Bo ta paga e kontribushon propio di $ 185,00 via banko riba kuenta di e doño di kas. Bo no tin derecho riba Kontribushon Hür Partikular si e kontribushon propio ta mas haltu ku e hür ku bo ta paga.
Kontribushon den kaso di entrada mas haltu ku sueldo mínimo
Pa un hende ku ta hasi petishon i ku tin un entrada mas haltu ku sueldo mínimo, nan ta determiná e kontribushon a base di un tabèl. Bo ta paga e kontribushon propio tur luna via banko riba kuenta di e doño di kas. Bo no tin derecho riba Kontribushon Hür Partikular si e kontribushon propio ta mas haltu ku e hür ku bo ta paga.
Kua ta e kondishonnan pa bini na remarke pa Kontribushon Hür Partikular?
Hürdó i doño di kas huntu
Huntu e hürdó i e doño di kas ta hasi petishon pa Kontribushon Hür Partikular. Partisipashon ta boluntariamente.
E hür no tin mag di ta mas haltu ku $ 979,00
E hür no tin mag di ta mas haltu ku $ 979,00 pa luna, sin gastu di servisio.
Kontribushon propio
Tur hende ku ta hür un kas i ku hasi petishon pa Kontribushon Hür Partikular, ta paga un kontribushon propio.
Kontribushon den kaso di sueldo mínimo òf mas abou
Bo tin sueldo mínimo òf un entrada mas abou ku sueldo mínimo? E ora ei bo ta paga $ 185,00 di kontribushon propio. Bo ta paga e kontribushon propio di $ 185,00 via banko riba kuenta di e doño di kas. Bo no tin derecho riba Kontribushon Hür Partikular si e kontribushon propio ta mas haltu ku e hür ku bo ta paga.
Kontribushon den kaso di entrada mas haltu ku sueldo mínimo
Pa un hende ku ta hasi petishon i ku tin un entrada mas haltu ku sueldo mínimo, nan ta determiná e kontribushon a base di un tabèl. Bo ta paga e kontribushon propio tur luna via banko riba kuenta di e doño di kas. Bo no tin derecho riba Kontribushon Hür Partikular si e kontribushon propio ta mas haltu ku e hür ku bo ta paga.
Sinku aña tras di otro sin interupshon inskribí na Registro Sivil
Bo ta inskribí pa por lo ménos sinku aña tras di otro na Registro Sivil i bo ta biba na Boneiru. E kondishon akí ta konta solamente pa petishon nobo, pues pa hende ku den aña 2026 pa promé biaha ta hasi petishon pa Kontribushon Hür Partikular. Siudadanonan ku promé ku 1 di yanüari 2026 ya kaba tabata haña Kontribushon Hür Partikular, i no tabata inskribí durante sinku aña sin interupshon na Registro Sivil, ta mantené nan derecho riba Kontribushon Hür Partikular te dia 1 di yüli 2026.
E kondishon di sinku aña tras di otro sin interupshon inskribí na Registro Sivil, no ta konta pa yunan di nos isla: personanan ku a nase na Boneiru òf ku tin un mayor ku a nase na nos isla.
Entrada bruto di tur hende di 18 aña bai ariba den e kas kontá huntu, no ta mas haltu ku $ 4633,00
Pa e petishon pa Kontribushon Hür Partikular nan ta pone entrada di tur hende di 18 aña bai ariba ku ta biba huntu ku e persona ku ta hasi petishon den kas, serka otro. E total di tur e entradanan akí huntu mester ta $ 4633,00 bruto òf mas abou.
Kua ta e dokumentunan ku mi tin ku manda huntu ku e petishon pa Kontribushon Hür Partikular?
- ID di e hürdó
- ID di e doño di kas
- Kopia di e kòntrakt di hür, e kòntrakt mester ta por lo ménos tres luna bieu
- Komprobante di pago di hür di e último tres lunanan (estado di kuenta di banko, resibu)
- Prueba di tur entrada ku bo a menshoná (kòntrakt di trabou, penshun, estado di kuenta di banko di e hürdó i estado di kuenta di banki di tur otro habitante di 18 aña bai ariba na e adrès ku tin entrada)
- Deklarashon di lugá di biba di e hürdó ku Registro Sivil a emití
Kon mi por hasi petishon pa Kontribushon Hür Partikular?
Tin dos manera pa hasi petishon pa Kontribushon Hür Partikular:
1. Bo por download, prent i yena e formulario di petishon, i entregá esaki huntu ku e pruebanan i aneksonan pidí. Bo ta hasi e petishon huntu ku e doño di kas.
2. Bo por buska e formulario di petishon na Direktorado di Komunidat i Kuido, bo ta yena e petishon, e doño di kas tambe tin un formulario pa yena. Bo ta entregá e formularionan huntu ku e dokumentunan i pruebanan ku ta nesesario.
PAGA TINU: E petishon mester ta kompletamente yená, bo tin ku entregá kopia di tur e dokumentunan pidí tambe. Despues ku nos a risibí bo petishon, ta dura maksimalmente tres siman pa prosesá esaki. Si bo petishon no ta kompletamente yená òf bo no a entregá tur dokumentu, nos no por trata bo petishon.
Bo ta entregá e petishon na Direktorado di Komunidat i Kuido, Kaya Neerlandia 41. Bo por hasi esaki for di djaluna te ku djabièrnè for di 08.00 or te 11.00 or.
Mi tin pregunta òf mi tin mester di yudansa pa yena e petishon pa Kontribushon Hür Partikular. Kiko mi por hasi?
Direktorado di Komunidat i Kuido tin un tim spesial di Kontribushon Hür Partikular pa kontestá tur bo preguntanan:
1. Manda un email na aportehurpartikular@bonairegov.com
2. Traha un sita via +599 717 2211
