Q3 2025 aktualisashon malesanan infeksioso

Henter aña GGD Boneiru ta monitoreá kua ta e malesanan di infekshon ku ta okurí na nos isla. Kada kuartal nos ta duna un aktualisashon kòrtiku. Di e manera akí tur hende ta keda na altura di loke ta tumando lugá i kiko bo mes por hasi pa keda salú.

Malesa di sangura

Den e lunanan yüli, ougùstùs i sèptèmber (e di tres kuartal di aña 2025, Q3 2025) ménos hende a bai nan dòkter di kas ku keho di un malesa di sangura, manera dengue. Den e periodo akí tabatin 13 infekshon di dengue konfirmá. Esaki ta hopi ménos ku den e promé tres lunanan di e aña akí, ora ku 228 hende a haña dengue (Q1 2025).

E kantidat di notifikashon ta baha tur luna. Esaki por tin komo motibu ku ménos áwaseru ta kai, ku hendenan a bai ku vakansi, òf ku hopi hende ya kaba a haña dengue. Tòg GGD Boneiru ta pidi tur hende pa keda alerta pa posibel lugánan di brui di sangura rònt di nan kas. Esaki pasobra e sanguranan na Boneiru por transmití otro malesa tambe, manera por ehèmpel chikungunya òf zika.

Segun PAHO (Pan American Health Organization) / WHO (World Health Organization), den luna di yüli nan a méldu vários kaso di chikungunya na Cuba. Esaki ta pa promé biaha despues di un tempu hopi largu, esta for di aña 2015. Na Barbados tambe mas tempran e aña akí nan a mèldu algun infekshon ku chikungunya. GGD Boneiru ta vigilá e situashon den e region akí. Na e seis islanan di Karibe Hulandes nan no a mèldu kasonan di chikungunya e aña akí ainda. E último brote grandi na e seis islanan akí a tuma lugá entre 2014 i 2016.

Keho di barika

Den e di tres kuartal mas hende a bai nan dòkter di kas ku keho di barika, kompará ku e lunanan anterior. Prinsipalmente den periodo di zomer mas hende tabatin molèster di diarea (infeksioso) i infekshon di stoma i tripa. Prinsipalmente entre fin di luna di yüli i kuminsamentu di luna di sèptèmber, durante vários siman tras di otro tabatin mas hende malu ku normalmente ta e kaso. Huntu ku e laboratorionan a wak si un vírùs òf bakteria spesífiko tabata kousa di esaki. A resultá ku esaki no tabata asina. Probablemente e periodo di zomer a hunga un ròl: kome i tene barbekiú mas tantu biaha na aire liber, landa i bishitá sitionan kaminda higiena ta ménos bon, ta oumentá e chèns pa haña keho di  stoma i tripa.

GGD Boneiru ta konsehá tur hende pa apliká bon higiena na momentu di prepará i kome kuminda. Bon higiena i siguridat di kuminda ta redusí e chèns pa haña keho di barika.

Kiko mas GGD ta hasi: deklarashon di salú di barku

Un parti di nos trabou ta purba evitá ku malesa ta drenta Boneiru via barku. Rònt mundu kada barku, promé ku e yega den haf, mester yena un deklarashon di salú. Den e deklarashon nan ta nota si tin hende malu na bordo. Si tin hende ku un malesa kontagioso, nan ta informá GGD. E ora ei GGD ta wak e situashon i eventualmente duna e barku konseho. Masha tiki biaha GGD por imponé un medida ku pasaheronan no tin mag di baha for di e barku. E ora ei personanan ku un malesa kontagioso ta keda den karentena na bordo.

Den e di tres kuartal di aña 2025, GGD Boneiru a kontrolá deklarashon di salú di 31 barku (krusero). Riba tur barku e kantidat di hende malu na bordo tabata tiki. Den kaso di un solo barku krusero, empleadonan di GGD a subi na bordo pa kontrolá kua ta e medidanan ku nan a tuma pa evitá plamamentu di malesa di infekshon.

Bo tin pregunta tokante malesa di infekshon? E ora ei tuma kontakto ku GGD Boneiru via (+599)715 5324.