Q2 aktualisashon malesa kontagioso

Dengue

Den e aktualisashon anterior nos a skirbi ku for di komienso di aña 2024 mas hende a haña dengue na Boneiru. Den e di dos kuartal di e aña akí tambe tabatin dengue ainda: den luna di aprel, mei i yüni tabatin en total 128 kaso konfirmá. Probablemente hopi mas tantu hende tabatin dengue, pa motibu ku mayoria hende no tin keho òf tin keho leve i nan no ta bai dòkter. Afortunadamente no tabatin hopi hende ku a bira asina malu ku nan mester a bai hòspital.

Ku kada notifikashon di dengue e inspektornan di nos tim di vector ta bai wak si tin lugá kaminda sangura ta brui den i rònt di e kasnan i edifisionan i nan ta trata esakinan. Nan ta duna tep tambe pa evitá plamamentu di dengue. Tanten ku tin sangura di dengue i e vírùs di dengue na nos isla, dengue no por disparsé kompletamente, pero nos por purba evitá sí ku e ta plama. Den esaki nos komunidat tin un ròl hopi importante.