Lei i reglanan

Departamento di Asuntunan Hurídiko i General (JAZ) ta enkargá ku dunamentu di sosten na Kolegio Ehekutivo i e aparato públiko pa loke ta trata tur problema hurídiko i gubernamental. Ku esaki e departamento ta un figura sentral dentro di e organisashon i ta sòru pa dentro di e entidat públiko tur kos ta kana konforme legislashon i regulashon. E departamento ta enbolbí ku práktikamente tur problema i tópiko hurídiko ku ta biba riba nos isla. Pa e motibu aki e dinamismo dentro di e departamento ta grandi.

Mas aleu e departamento ta enkargá ku entrega di pèrmit di APK (ordenansa general di polis) i tambe pèrmit di bufèt, pèrmit di loteria riba bienes i pèrmit di Bingo. Banda di esaki e departamento ta okupá su mes ku formulashon di legislashon i regulashon, entre otro regulashon lokal manera ordenansanan insular i dekretonan insular konteniendo medidanan general.

Aki por pensa riba regulashon riba tereno di APK (ordenansa general di polis), prekario, tráfiko, kas pa pueblo, supsidio, diferente tipo di impuesto i un kantidat grandi mas di diferente areglo. E departamento aki ta formulá tambe ordenansanan di emergensia i órdennan di emergensia. Mas aleu e departamento ta okupá su mes ku preparashon di toma di desishon i tratamentu di proseduranan di opheshon i apelashon.