Dekreto di Gezaghèber di Boneiru (23 aprel 2021) Lesa mas tokante di e pandemia COVID-19

 

Akuerdo Intergubernamental

E Akuerdo Intergubernamental ta un akuerdo formulá entre Entidat Públiko Boneiru i Reino pa alkansá sierto metanan konhunto. Kalidat di bida i e servisio ku gobièrnu ta duna na e suidadano a sirbi komo guia den e akuerdo ku a sera.

A sera e akuerdo pa un periodo di kuater aña, kuminsando na aña 2018 i ku un durashon te na fin di aña 2022. E akuerdo mes ta konsistí di 11 tema prioritario, repartí den 40 proyekto ku ta varia di akohida pa mucha pagabel i bon organisá te na drechamentu di kaminda i tambe fortifikashon di e aparato públiko.

Huntu nos ta traha pa un mihó Boneiru!

Huntu ku Reino Entidat Públiko Boneiru ta traha intensivamente na realisashon di e palabrashonnan ku a hasi den e Akuerdo Intergubernamental.

E Mènedjer di Programa di e Akuerdo Intergubernamental diariamente ta monitoriá i aktivamente ta duna direkshon na e metanan, huntu ku su ofisina di programa. Periódikamente tur e partidonan ta sinta na mesa pa papia tokante e progreso i pa ahustá esaki kaminda ta posibel. For di e konsultanan aki un biaha pa kuartal ta resultá un raportahe di progreso for di kua tur partido por saka e informashonnan nesesario pa por keda duna direkshon na e direktoradonan i ministerionan pa un bon desaroyo di e Akuerdo Intergubernamental. E Akuerdo Intergubernamental ta un kolaborashon intensivo i kontinuo entre e Mènedjer di Programa, Kolegio Ehekutivo di Boneiru, Ministerio di Asuntunan Interno i Relashonnan den Reino i Representante di Reino.