Orkan - Loke gobièrnu ta hasi

Loke gobièrnu ta hasi

Efektonan di un orkan por ta grave pa bo kas si bo no tuma prekoushon. Gobièrnu tin un tim di kombatimentu di desaster ku ta kombatí e konsekuensianan di un krisis òf desaster. Huntu ku diferente instansia i servisio e ta kordiná kiko mester pasa ora di peliger durante i despues di un orkan / tormenta tropikal. E representantenan di e organisashon aki ta reuní regularmente, ta sigui desaroyonan lokal i internashonal i ta yuda avisá gobièrnu tokante e pasonan ku mester tuma.

Entidat Públiko Boneiru ta organisá sentro di akohida pa hendenan ku no ta seif den nan mes kas. Banda di esei e ta suministrá komunidat Boneriano ku informashon nesesario. Den kaso di un orkan / tormenta tropikal Entidat Públiko Boneiru ta alertá pueblo tokante e seriedat di esaki.

Banda di esei tur hende tin e obligashon di informá nan mes i nan famia delantá i tuma e prekoushonnan nesesario.