Dia 16 di novèmber 2026 Entidat Públiko Boneiru i Sentro Akseso ta ranka sali ku e Wijkscan 2026. Ku e skèn di bario akí nan ke komprendé mas mihó kiko ta biba den e barionan di Boneiru.
E habitantenan sa mas bon kiko ta bai bon den nan bario i kiko por mihó. Pa e motibu akí nan eksperensianan, ideanan i nesesidatnan ta importante. E informashon for di e Wijkscan ta yuda Entidat Públiko Boneiru i Sentro Akseso ku desaroyo di maneho, i ku fasilidatnan i aktividatnan ku ta konektá ku loke e habitantenan tin nesesidat di dje.
E promé edishon di e Wijscan ta enfoká riba seis bario: Tera Kòrá, Nikiboko, Amboina, Antriol, Nort di Saliña i Rincon. Loke nos siña for di e promé Wijkscan akí, nos ta inkluí den e futuro skènnan di bario den otro barionan i bisindarionan.
Kiko ta pasando den bo bario?
Pa e Wijkscan nos ke alkansá mas tantu habitante posibel. No solamente e hendenan ku ta aktivo kaba den nan bario, pero tambe e habitantenan ku tiki biaha ta partisipá na aktividat òf ku ta hasi tiki uso di fasilidat.
Ken por partisipá?
Habitantenan di 12 aña bai ariba ku ta biba den un di e seis barionan ku ta partisipá, por partisipá na e Wijkscan 2026. E lista di pregunta ta disponibel digitalmente na kuater idioma: papiamentu, hulandes, ingles i spañó.
Por yena e lista di pregunta via: https://forms.cloud.microsoft/Pages/ResponsePage.aspx?id=HOqRKzLY002FLEVCC1KC6xIE40ezT8pOmV8MAasX-UdUMVZRUU5JVFYxOUswMjE5R1lVSjZZRk1DTS4u
Pa alkansá mas tantu habitante posibel, banda di e lista di pregunta digital tin otro manera tambe pa partisipá. Dia 21 i 28 di novèmber un tim spesial ta drenta e barionan pa informá e habitantenan i yuda nan yena e lista di pregunta.
Sentro Akseso tambe ta sostené e habitantenan ku yenamentu di e lista di pregunta. Esaki ta tuma lugá entre otro ora ku tin aktividat den e sentronan di bario i pa medio di sosten personal.
Kiko ta pasa ku e resultadonan?
E resultadonan di e Wijkscan ta sòru pa konosementu di loke e habitantenan ta haña importante i kua ta e nesesidatnan ku ta biba den e barionan. Nan ta usa e informashon akí na momentu di desaroyo di maneho, aktividatnan i inisiativanan ku ta konektá mas mihó ku deseonan di e habitantenan.
Laga skucha bo bos pa un dushi bario. Partisipá na e Wijkscan 2026!
Partisipá na e Wijkscan 2026 i laga skucha bo bos. Huntu nos ta traha pa logra barionan agradabel, embolbí i habitabel na Boneiru.

