Trabounan di rekonstrukshon di Kaya Grandi Fase 3 ta sigui tuma lugá, ku enfoke riba mehorashon di e sistema di desagwe, aksesibilidat pa outo i peaton, i kreashon di un sentro di siudat mas bunita i moderno. E fase aki ta kubri parti di Kaya Grandi for di kuminsamentu di Kaya Isla Ariba te na haltura di e krusada ku Kaya L.D. Gerharts. Durante e trabounan, ta realisá diferente mehorashon importante pa garantisá un infrastruktura mas adekuá.
Un di e puntonan prinsipal di e proyekto ta modernisashon di e sistema di desagwe. A oumentá e pipa prinsipal di awa ku un diámetro di 60 sentímeter, ku e meta pa mehorá e kapasidat pa transportá awa di yobida. Ademas, a renobá i instalá “straatkolk” nobo na banda di kaminda, ku ta konektá ku e pipa sentral. A instalá por lo ménos 10 “straatkolk” ku ta distribuí a lo largu di e kaminda, pa fasilitá kolekshon i desague di awa di yobida mas rápido.
E kaya a keda konstruí segun un diseño ku ta konosí komo “dakprofiel”. Esaki ta nifiká ku e parti sentral di kaya ta keda mas haltu ku e bandanan. E forma aki ta yuda pa dirigí awa di yobida bai na e bandanan, kaminda e “straatkolk” ta kolektá e awa i transport’é pa medio di e sistema di desagwe. Ku e kombinashon di e pipa mas grandi, e “straatkolk” nobo i diseño di kaya, e proyekto ta buska pa redusí problema ku awa ku ta keda para riba kaya i mehorá funshonamentu di e infrastruktura durante i despues di yobida.
E meta ta pa finalisá e fase aki promé ku fin di aña 2026. Despues di finalisashon, esaki lo ta habrí pa peaton. Na yanüari 2027, ta planifiká pa kuminsá ku e rekonstrukshon di Kaya Kòrsou I tambe fase final di Kaya Grandi, na haltura di e krusada ku Kaya L.D. Gerharts te Kaya Boneiru. Despues ku e trabounan relevante ta kompletá, i ora kondishonnan di seguridat ta permití, Kaya Grandi lo habri atrobe pa tráfiko di outo.
Ku e proyekto aki, e meta ta pa sigui mehorá kalidat di infrastruktura den sentro di siudat, krea un ambiente mas agradabel pa habitante i bishitantenan, i garantisá un espasio públiko mas aksesibel i funshonal pa tur hende.
