Karni seif i bon bienestar di bestia ta kuminsá na matadero. Pa e motibu akí Direktorado di Supervishon i Mantenshon di Lei for di 31 di ougùstùs te ku 11 di sèptèmber a organisá un treinen pa matadónan di bestia na Boneiru. E meta: duna e empleadonan konosementu i abilidat pa traha na un manera higiéniko, seif i konsiente di bienestar di animal.
E treinen tabata na enkargo di Peter Bolkenbaas di ‘SVO vakopleider food’, ku ta organisá kapasitashon pa hende den sektor di alimento. Bolkenbaas tin mas di 20 aña di eksperensia komo dosente di matamentu di bestia i prosesamentu di karni. E matadónan fiho di bestia di matadero i matadónan nobo di bestia a partisipá na e treinen, i tambe otro empleadonan di Entidat Públiko Boneiru ku ta interesá den e trabou akí, i dos empleado di Plenchi di Trabou. Parti mainta nan a trein na matadero i parti mèrdia nan a sigui lès di teoria na Direktorado di Supervishon i Mantenshon di Lei.
E partisipantenan a siña kon nan ta trata i mata galiña, porko i kabritu na un manera responsabel. Huntu ku e kriadónan di bestia nan a wak tambe e transporte di bestia pa matadero. Ménos strès un bestia eksperensiá, mas mihó esaki ta pa e bestia i pa kalidat di e karni. Tin ora adaptashonnan simpel ya kaba ta sufisiente, manera ménos galiña den un kaha.
Mirte Kruijt, hefe di departamento di Servisio Veterinario: “E parti bunita ta ku nos no a solamente duna atenshon na e matadero. Pa medio di bai den kòmbersashon ku e kriadónan di bestia tambe, nos ta mehorá bienestar di animal for di kuminsamentu. Al final e konsumidó tambe ta ripará esaki, den kalidat di e karni.”
Na final tur partisipante a risibí un sertifikado. Ku esaki Boneiru ta disponé di un grupo di matadó di bestia bon entrená ku ta traha konforme e reglanan korekto di higiena i bienestar di animal.
