E wikènt akí Entidat Públiko Boneiru ta presente na dos feria di karera: djabièrnè 23 di òktober na Feria di Karera na Boneiru i djasabra 24 di òktober na FRED Expo na Rotterdam. Sea ku bo ta biba na Boneiru òf na Hulanda, tur dos feria ta brinda un oportunidat pa sera konosí ku Entidat Públiko Boneiru, deskubrí e vakaturanan ku tin i papia tokante kon bo por kontribuí na desaroyo di Boneiru.
Deskubrí e posibilidatnan ku tin na Entidat Públiko Boneiru
Entidat Públiko Boneiru ta ofresé posibilidat di karera pa hende ku diferente bèkgrount, formashon i eksperensia di trabou. For di funshonnan atministrativo i di sosten, te funshonnan spesialisá i ehekutivo: tin posibilidat den diferente área profeshonal.
Durante e ferianan tin empleadonan di Entidat Públiko Boneiru presente pa konta bishitantenan mas tokante e organisashon i e vakaturanan aktual i di futuro. Sea ku bo ta na komienso di bo karera, bo ta kla pa asumí un desafio nobo òf bo ta konsiderá pa regresá Boneiru for di Hulanda, bo ta kordialmente bon biní pa pasa un ratu.
Aparte di Entidat Públiko Boneiru tin hopi otro dunadó di trabou presente. Ku esaki e ferianan ta brinda un bunita oportunidat pa establesé kontaktonan nobo, amplia bo ret i deskubrí diferente posibilidat di karera.
Sitio i ora
Feria di Karera – Boneiru
- Djabièrnè 23 di òktober 2026
- Ora: 16.00 – 21.00 or
- Sitio: Jong Bonaire
- Entrada: Grátis, registrashon no ta nesesario
FRED Expo – Rotterdam
- Djasabra 24 di òktober 2026
- Ora: 11.00 – 19.00 or
- Sitio: WTC Rotterdam
- Entrada: Grátis, registrá viawww.fredexpo.com
- Stènt 29
Entidat Públiko Boneiru ta invitá tur hende ku ta interesá pa traha na Entidat Públiko Boneiru i kontribuí na bienestar i desaroyo di Boneiru, pa pasa un ratu i deskubrí e posibilidatnan.
#AmiTaTrahaPaBoneiru
